पारध येथे ‘आरोग्याचा श्री गणेशा’ कॅम्प उत्साहात; धार्मिक उत्सवाला सामाजिक बांधिलकीची जोड
By तेजराव दांडगे
पारध येथे ‘आरोग्याचा श्री गणेशा’ कॅम्प उत्साहात; धार्मिक उत्सवाला सामाजिक बांधिलकीची जोड
पारध (विशेष बातमीदार): भोकरदन तालुक्यातील पारध बुद्रुक येथे आरोग्य उपकेंद्राच्या अंतर्गत ‘आरोग्याचा श्री गणेशा’ या विशेष संकल्पनेतून असंसर्गजन्य आजारांबाबत (NCD) जनजागृती व आरोग्य मार्गदर्शन शिबिराचे आयोजन करण्यात आले. सामाजिक कार्यकर्ते सागर देशमुख यांच्या संकल्पनेतून, श्री श्रद्धा गणेश उत्सव मंडळाच्या आयोजनातून आणि आरोग्य विभागाच्या सहकार्याने हा उपक्रम उत्साहात पार पडला.
आरोग्य जनजागृती आणि मार्गदर्शन
गणेशोत्सवाच्या पावन पर्वात धार्मिक वातावरणासोबतच नागरिकांच्या आरोग्याची काळजी घेण्याचा एक अभिनव उपक्रम पारध येथे पाहायला मिळाला. या कॅम्पमध्ये प्रामुख्याने खालील विषयांवर मार्गदर्शन करण्यात आले:
- हृदयरोग, मधुमेह आणि स्थूलता: बदलत्या जीवनशैलीमुळे वाढणाऱ्या आजारांवर नियंत्रण आणि प्रतिबंधात्मक उपाय.
- कर्करोग जनजागृती: तोंड, स्तन व गर्भाशयाच्या कर्करोगाचे प्राथमिक निदान आणि लक्षणांविषयी माहिती.
- आहार आणि व्यायाम: नियमित आरोग्य तपासणी, योग्य आहार आणि दैनंदिन व्यायामाचे महत्त्व.
कार्यक्रमात डॉ. रेश्मा चौधरी यांनी उपस्थित नागरिकांना आरोग्याविषयी मोलाचे मार्गदर्शन केले.
प्रमुख उपस्थिती
या उपक्रमास परिसरातील अनेक मान्यवर, राजकीय व सामाजिक क्षेत्रातील पदाधिकारी उपस्थित होते. यामध्ये ह.भ.प. विष्णू महाराज सास्ते, अंबादास महाराज लोखंडे, पंचायत समितीचे माजी सभापती परमेश्वर लोखंडे, माजी सरपंच गणेश लोखंडे, माजी सरपंच अशोक लोखंडे, आदर्श शिक्षक समाधान लोखंडे, पशुवैद्यकीय अधिकारी डॉ. फुके, प्रा. साहेबराव लोखंडे, प्रा. संग्राम देशमुख, मुख्याध्यापक हातकडे, शिक्षक नेते अजहरखा पठाण, भाजप नेते दिलीप बेराड, शिक्षण संस्थेचे सचिव उदयसिंह लोखंडे, ज्येष्ठ पत्रकार रवींद्र सर लोखंडे, रामसिंग ठाकूर, गजू नाना देशमुख, रमेश जाधव, संजय कातोरे, हरिभाऊ तबडे, राजर्षी शाहू बँकेचे कर्मचारी, आशा सेविका, आरोग्य कर्मचारी आणि पारध येथील ग्रामस्थ मोठ्या संख्येने उपस्थित होते.
आयोजकांचे परिश्रम
कार्यक्रमाच्या यशस्वीतेसाठी श्री श्रद्धा मित्र मंडळाचे अध्यक्ष दीपक दांडगे, सचिव तुषार काटोले, रमेश काटोले, प्रभाकर जहागीरदार, दिलीप गोठवाल, मंगेश बागुलकर, गजानन पोपळघट, सार्थक काटोले, आनंद डाकोरकर, शुभम जहागीरदार, कार्तिक क्षिरसागर, गौरव काटोले, गौरव पोपळघट, रुद्र पायघन, प्रभु पोपळघट, उमेश ताजी व मंडळाच्या सर्व कार्यकर्त्यांनी विशेष परिश्रम घेतले.
प्रमुख प्रतिक्रिया
“श्रद्धा मित्र मंडळाचा स्तुत्य उपक्रम”
“पारध पोलिस स्टेशनच्या हद्दीतील ३३ गावांमध्ये ७४ गणेश मंडळे आहेत. मात्र, श्रद्धा मित्र मंडळाने राबविलेला ‘आरोग्याचा श्री गणेशा’ हा उपक्रम अत्यंत स्तुत्य आणि समाजोपयोगी आहे. धार्मिक उत्सवाला सामाजिक बांधिलकीची जोड देत आरोग्य जनजागृतीचा संदेश देण्याचे काम या मंडळाने केले आहे.”
— सचिन खामगळ (सहाय्यक पोलिस निरीक्षक, पारध पोलिस स्टेशन)
“निरोगी पारध, सशक्त समाज हाच आमचा संकल्प”
“गणेशोत्सव म्हणजे केवळ उत्सव नसून समाजाला दिशा देण्याची संधी आहे. आजारी पडल्यानंतर उपचार करण्यापेक्षा आजार होऊच नये यासाठी जनजागृती करणे अधिक महत्त्वाचे आहे. ‘निरोगी पारध, सशक्त समाज’ हीच आमची भूमिका असून असे उपक्रम पुढेही सुरू राहतील.”
— सागर राजे देशमुख (सामाजिक कार्यकर्ते व संकल्पक)
