कारची काच फोडून १० लाखांची रोकड लांबवणाऱ्या आंध्र प्रदेशातील चोरट्यांचा पर्दाफाश; बदनापूर पोलिसांकडून ६ लाख रुपये जप्त

कारची काच फोडून १० लाखांची रोकड लांबवणाऱ्या आंध्र प्रदेशातील चोरट्यांचा पर्दाफाश; बदनापूर पोलिसांकडून ६ लाख रुपये जप्त

​बदनापूर (विशेष बातमीदार): बँकेतून पैसे काढून कारमध्ये ठेवून गेलेल्या एका व्यक्तीच्या कारची काच फोडून १० लाख रुपयांची रोकड चोरणाऱ्या अंतरराज्यीय टोळीचा बदनापूर पोलिसांनी पर्दाफाश केला आहे. या प्रकरणाचा तांत्रिक तपास करत पोलिसांनी थेट आंध्र प्रदेश गाठून चोरट्यांच्या घरातून ६ लाख रुपयांची रोख रक्कम जप्त करण्यात मोठे यश मिळवले आहे.

​नेमकी काय घडली होती घटना? धोपटेश्वर (ता. बदनापूर) येथील रहिवासी विष्णू कुंडलीकराव कोल्हे यांनी ४ सप्टेंबर २०२६ रोजी बदनापूर शहरातील स्टेट बँक ऑफ इंडियाच्या (SBI) शाखेतून १० लाख रुपये काढले होते. हे पैसे कारमध्ये ठेवून ते धोपटेश्वर ते देवगाव रोडवर थांबले आणि शेतात निघून गेले. याच संधीचा फायदा घेत चोरट्यांनी कारच्या मागील दरवाजाची काच फोडून आत ठेवलेली १० लाखांची रक्कम लंपास केली. या प्रकरणी बदनापूर पोलीस ठाण्यात अज्ञात चोरट्यांविरोधात गुन्हा नोंदवण्यात आला होता.

​CCTV आणि तांत्रिक तपासावरून धागेधोरे घटनेचे गांभीर्य ओळखून पोलीस निरीक्षक एम. टी. सुरवसे यांनी तात्काळ तपासाची चक्रे फिरवून दोन विशेष पथके तयार केली. परिसरातील CCTV फुटेज आणि तांत्रिक माहितीच्या आधारे तपास केला असता, एका दुचाकीवर आलेल्या दोन संशयितांनी कारचा पाठलाग करून ही चोरी केल्याचे निष्पन्न झाले.

​तपासादरम्यान हे संशयित आंध्र प्रदेश राज्यातील नेल्लोर जिल्ह्यातील असल्याचे समोर आले:

• ​गुंजी चालराजु जबराज (रा. कपरला टिपा, ता. बिटरगुंटा, जि. नेल्लोर, आंध्र प्रदेश)
• ​गुड्डेटी विनोत प्रभुदास (रा. कपरला टिपा, ता. बिटरगुंटा, जि. नेल्लोर, आंध्र प्रदेश)

​आंध्र प्रदेशात जाऊन ६ लाखांची रोकड हस्तगत बदनापूर पोलिसांचे विशेष पथक आरोपींचा शोध घेण्यासाठी तात्काळ आंध्र प्रदेशात रवाना झाले. तेथे आरोपींचा शोध घेतला असता ते पसार झाल्याचे दिसून आले. मात्र, पोलिसांनी त्यांच्या राहत्या घराची झडती घेतली असता चोरीस गेलेल्या १० लाखांपैकी ६ लाख रुपयांची रोख रक्कम हस्तगत करण्यात पोलिसांना यश आले. उर्वरित ४ लाख रुपये आणि फरार आरोपींचा शोध घेण्यासाठी पोलीस पथके कार्यरत आहेत.

​या पथकाने केली धडक कारवाई जालना जिल्ह्याचे पोलीस अधीक्षक तेगबीर सिंह संधू, अपर पोलीस अधीक्षक विक्रम साळी आणि उपविभागीय पोलीस अधिकारी अनंत कुलकर्णी यांच्या मार्गदर्शनाखाली बदनापूरचे पोलीस निरीक्षक एम. टी. सुरवसे, पोलीस उपनिरीक्षक एस. आर. कुकलारे, पोलीस अंमलदार ए. एस. दासर, भडंगे, पी. के. गोलवाल आणि एस. जे. तडवी यांच्या पथकाने ही यशस्वी कारवाई केली आहे.