पारध येथे स्व. राजेंद्रजी श्रीवास्तव यांच्या पुण्यतिथीनिमित्त मोफत नेत्र चिकित्सा शिबीर; ३७६ रुग्णांची तपासणी, ३७ जणांवर होणार मोफत शस्त्रक्रिया
By तेजराव दांडगे
पारध येथे स्व. राजेंद्रजी श्रीवास्तव यांच्या पुण्यतिथीनिमित्त मोफत नेत्र चिकित्सा शिबीर; ३७६ रुग्णांची तपासणी, ३७ जणांवर होणार मोफत शस्त्रक्रिया
पारध/जालना: सामाजिक बांधिलकीची २५ वर्षांची प्रदीर्घ परंपरा जपत, स्व. राजेंद्रजी श्रीवास्तव यांच्या पुण्यतिथीनिमित्त पारध येथे भव्य मोफत नेत्र चिकित्सा व तपासणी शिबिराचे यशस्वी आयोजन करण्यात आले होते. स्व. राजेंद्रजी श्रीवास्तव शैक्षणिक संकुल व लायन्स क्लब (छत्रपती संभाजीनगर) यांच्या संयुक्त विद्यमाने या शिबिराचे आयोजन करण्यात आले होते. गेल्या २३ वर्षांपासून स्व. राजेंद्रजी श्रीवास्तव यांची पुण्यतिथी ही केवळ एक स्मृती दिन म्हणून न साजरी करता सर्वरोग निदान शिबीर, अपंग सहाय्यता शिबीर, नेत्र व दंत चिकित्सा, तसेच रक्तदान शिबिरासारख्या विविध लोकहितोपयोगी उपक्रमांनी साजरी केली जाते.
आदर्श शिक्षक एन. एम. लोखंडे यांच्या हस्ते उद्घाटन
या जनहितैषी शिबिराचे रीतसर उद्घाटन सेवानिवृत्त आदर्श शिक्षक एन. एम. लोखंडे यांच्या शुभहस्ते करण्यात आले. या शिबिराला पारध परिसरातील नागरिकांचा उत्स्फूर्त प्रतिसाद लाभला. शिबिरादरम्यान एकूण ३७६ रुग्णांच्या डोळ्यांची तज्ज्ञ डॉक्टरांकडून सखोल तपासणी करण्यात आली.
३७ रुग्णांची मोतीबिंदू शस्त्रक्रिया मोफत होणार
तपासणी करण्यात आलेल्या रुग्णांपैकी ३७ रुग्णांना मोतीबिंदू असल्याचे निदान झाले आहे. या सर्व ३७ रुग्णांची पुढील मोतीबिंदू शस्त्रक्रिया लायन्स क्लब हॉस्पिटल (काळा गणपती मंदिराच्या पाठीमागे, छत्रपती संभाजीनगर) येथे पूर्णपणे मोफत केली जाणार आहे. यामुळे ग्रामीण भागातील गरजू रुग्णांना मोठा आर्थिक दिलासा मिळाला आहे.
प्रमुख मान्यवर आणि ग्रामस्थांची मोठी उपस्थिती
या सामाजिक उपक्रमाच्या वेळी पारध ग्रामपंचायतीच्या प्रशासक शारदा काकफळे, शिवसेनेचे उपसरपंच शेखर श्रीवास्तव, सुनील डोईफोडे, गणेश लोखंडे, समिखा पठाण, दिनेश सुरडकर, बाबुराव काकफळे, जगन पाटील आणि परमेश्वर आल्हाट उपस्थित होते.
त्याचप्रमाणे बाळासाहेब जाधव, शे. सादिक, शेख जमील, अझहर पठाण, दिलीप देशमुख, बाबासाहेब देशमुख, चेअरमन विश्वास लोखंडे, समाधान पाटील, सुरेशराजे देशमुख, संदीप क्षिरसागर, जगदीश शावकार, काशिनाथ आल्हाट, उत्तम लोखंडे, प्रकाश क्षिरसागर, प्रशांत मोकासरे, विशाल तेलंग्रे, रमेश बनकर यांच्यासह परिसरातील अनेक पत्रकार, प्रतिष्ठित नागरिक आणि ग्रामस्थ बांधव मोठ्या संख्येने उपस्थित होते.
