पारध पोलीस ठाण्यात गुन्हा दाखल; धामणा धरणातून झिंगे चोरीला विरोध केल्याने सुरक्षारक्षकासह कुटुंबाला मारहाण
By तेजराव दांडगे
पारध पोलीस ठाण्यात गुन्हा दाखल; धामणा धरणातून झिंगे चोरीला विरोध केल्याने सुरक्षारक्षकासह कुटुंबाला मारहाण
भोकरदन / पारध: भोकरदन तालुक्यातील पद्मावती येथील धामणा (पद्मावती) धरणातून बेकायदेशीरपणे झिंगे पकडण्यास आणि चोरी करण्यास विरोध केल्याने धरणाच्या सुरक्षारक्षकाला आणि त्यांच्या कुटुंबाला मारहाण केल्याची धक्कादायक घटना समोर आली आहे. या प्रकरणी पारध पोलीस ठाण्यात एका नामजद आरोपीसह एकूण ७ जणांविरुद्ध भारतीय न्याय संहितेच्या (BNS) विविध कलमांनुसार गुन्हा दाखल करण्यात आला आहे.
नेमकी घटना काय?
पोलीस सूत्रांकडून मिळालेल्या माहितीनुसार, योगीराज किसन शेवाळे (वय ४८ वर्षे, रा. पद्मावती) हे धामणा धरणावर वॉचमन (सुरक्षारक्षक) म्हणून कार्यरत आहेत. ९ जून २०२६ रोजी दुपारी २:०० ते रात्री ८:०० वाजेच्या सुमारास आरोपी कृष्णा कौतीक गवळी (रा. धावडा, ता. भोकरदन) याने आपल्या इतर तीन साथीदारांसह धरणातून ६,३०० रुपये किमतीचे ७ किलो झिंगे (९०० रुपये किलो दराने) बेकायदेशीरपणे चोरून नेले.
फिर्यादी योगीराज शेवाळे यांनी धरणातून अशा प्रकारे झिंगे पकडण्यास आरोपींना मज्जाव केला. याच गोष्टीचा मनात राग धरून आरोपींनी गैरकायद्याची मंडळी जमवून पुढील कृत्य केले.
घरासमोर येऊन मारहाण आणि जीवे मारण्याची धमकी
धरणावरील वादानंतर आरोपी कृष्णा गवळी आणि त्याच्यासोबतच्या इतर ६ जणांनी फिर्यादी यांच्या घरासमोर जाऊन गोंधळ घातला. त्यांनी फिर्यादी योगीराज शेवाळे आणि त्यांच्या मुलाला चापटा-बुक्क्यांनी बेदम मारहाण केली. तसेच त्यांच्या पत्नीला अश्लील शिवीगाळ करत जीवे मारण्याची धमकी दिली.
पारध पोलिसांत गुन्हा दाखल; तपास सुरू
या घटनेनंतर फिर्यादी यांनी पारध पोलीस ठाण्यात धाव घेत रीतसर तक्रार नोंदवली. पारध पोलीस ठाण्याचे सहाय्यक पोलीस निरीक्षक (सपोनि) यांच्या आदेशाने आरोपींविरुद्ध गुन्हा रजि. नं. १७४/२०२६, कलम ३०३(२), १८९(२), १९१(१), ११५(२), ३५१(२), ३५२ BNS अन्वये गुन्हा दाखल करण्यात आला आहे.
सदर गुन्ह्याचा पुढील तपास सहाय्यक पोलीस उपनिरीक्षक (ASI) एस. एन. जायभाये आणि पोलीस हेडकॉन्स्टेबल सिनकर यांच्याकडे सोपवण्यात आला असून पोलीस इतर अज्ञात आरोपींचा शोध घेत आहेत.
