बदनापूर: जालना स्थानिक गुन्हे शाखेची मोठी कारवाई! साडेबारा लाखांच्या प्रतिबंधित गुटखा व पानमसाल्यासह वाहन जप्त; दोघांवर गुन्हे दाखल
By तेजराव दांडगे
बदनापूर: जालना स्थानिक गुन्हे शाखेची मोठी कारवाई! साडेबारा लाखांच्या प्रतिबंधित गुटखा व पानमसाल्यासह वाहन जप्त; दोघांवर गुन्हे दाखल
बदनापूर (विशेष प्रतिनिधी): जालना जिल्हा पोलीस अधीक्षकांच्या विशेष मार्गदर्शनाखाली स्थानिक गुन्हे शाखेने (LCB) बदनापूर पोलीस ठाण्याच्या हद्दीत मानवी आरोग्यास घातक आणि प्रतिबंधित असलेल्या गुटखा व पानमसाल्याच्या मोठ्या साठ्यावर छापा टाकला आहे. बाजार गेवराई मार्गे बदनापूरकडे येणाऱ्या एका वाहनातून तब्बल १२ लाख ६६ हजार ४३० रुपयांचा मुद्देमाल जप्त करण्यात आला असून या प्रकरणी दोन जणांविरुद्ध गुन्हा दाखल करण्यात आला आहे.
बाजार गेवराई मार्गावर रचला सापळा
जालन्याचे पोलीस अधीक्षक तेघबीर सिंह संधु आणि अप्पर पोलीस अधीक्षक विक्रम साळी यांना मानवी आरोग्यास घातक असलेल्या प्रतिबंधित गुटख्याची बेकायदेशीर वाहतूक होणार असल्याची गुप्त माहिती मिळाली होती. या माहितीच्या आधारे त्यांनी स्थानिक गुन्हे शाखेचे पोलीस निरीक्षक पंकज जाधव व त्यांच्या पथकाला तातडीने कारवाईचे आदेश दिले.
२४ मे २०२६ रोजी दुपारी १:३६ वाजेच्या सुमारास स्थानिक गुन्हे शाखेच्या पथकाने बदनापूर हद्दीत सापळा रचला. यावेळी बाजार गेवराई मार्गे बदनापूरकडे येणारे ‘अशोक लेलँड’ कंपनीचे वाहन (क्र. MH 20 EL 2194) संशयास्पद वाटल्याने पोलिसांनी ते थांबवून तपासणी केली.
साडेबारा लाखांचा मुद्देमाल जप्त
पोलिसांनी वाहनाची झडती घेतली असता, त्यात पांढऱ्या आणि खाकी रंगाच्या गोण्यांमध्ये लपवून ठेवलेला नामांकित कंपन्यांचा प्रतिबंधित गुटखा, पानमसाला आणि तंबाखूचा साठा मिळून आला. पोलिसांनी खालील मुद्देमाल जप्त केला आहे:
१) राजनिवास पान मसाला: १,६८,७५० रुपये किमतीचा साठा.
२) गोवा-१००० गुटखा: १,५३,००० रुपये किमतीचा साठा.
३) विमल पान मसाला: १,३०,६८० रुपये किमतीचा साठा.
४) के एन ०१ जाफरानी जर्दा: १,०८,००० रुपये किमतीचा साठा.
५) वि-१ विंग तंबाखू: ६,००० रुपये किमतीचा साठा.
६) वाहन (अशोक लेलँड आयरीश): अंदाजे ७,००,००० रुपये किमतीचे वाहन.
एकूण जप्त मुद्देमाल: १२,६६,४३० रुपये (बारा लाख सहासष्ट हजार चारशे तीस रुपये)
दोघांविरुद्ध बदनापूर ठाण्यात गुन्हा दाखल
या प्रकरणी पोलिसांनी वाहनचालक जावेद गुलाब मिर्झा बेग (वय ३४ वर्ष, रा. शेकटा, ता.जि. छत्रपती संभाजीनगर) आणि या साठ्याशी संबंधित असलेला संदीप भुमकर (रा. राजूर, जि. जालना) या दोघांविरुद्ध बदनापूर पोलीस ठाण्यात भारतीय न्याय संहिता (BNS) कायद्याच्या कलम १२३, २२३, २७५ आणि ३ (५) अन्वये गुन्हा दाखल केला आहे. या गुन्ह्याचा पुढील तपास पोलीस उपनिरीक्षक (पोउपनि) श्री. कुकलारे करत आहेत.
कारवाई करणारे पोलीस पथक:
ही धडक कारवाई पोलीस अधीक्षक तेगबिर सिंह संधु, अप्पर पोलीस अधीक्षक विक्रम साळी, उपविभागीय पोलीस अधिकारी अनंत कुलकर्णी यांच्या मार्गदर्शनाखाली स्थानिक गुन्हे शाखेचे पोलीस निरीक्षक पंकज जाधव, पोउपनि राजेंद्र वाघ, पोलीस अंमलदार सागर बाविस्कर, देवीदास भोजने, दत्ता वाघुंडे, आक्रूर धांडगे, धीरज भोसले, सोपान क्षीरसागर, सचिन राऊत आणि अशोक जाधवर यांच्या पथकाने यशस्वीरित्या पार पाडली.
