पारधच्या सरपंच शारदाबाई काकफळे यांचा ‘लोकमत सरपंच अवॉर्ड’मध्ये सन्मान!

पारधच्या सरपंच शारदाबाई काकफळे यांचा ‘लोकमत सरपंच अवॉर्ड’मध्ये सन्मान!

रोजगार निर्मिती आणि सरकारी योजनांच्या उत्कृष्ट अंमलबजावणीसाठी गौरव

पारध (बु.), ता. भोकरदन, दि. 17 : ‘लोकमत’ वृत्तपत्र समूहाच्या वतीने आयोजित ‘लोकमत सरपंच अवॉर्ड्स’ सोहळ्यात भोकरदन तालुक्यातील पारध बुद्रुकच्या सरपंच शारदाबाई काकफळे यांचा विशेष सन्मान करण्यात आला. त्यांनी रोजगार निर्मिती आणि सरकारी योजनांची प्रभावी अंमलबजावणी केल्याबद्दल हा पुरस्कार पटकावला.

जालना येथे गुरुवारी (दि. 15) अंबड रोडवरील मातोश्री लॉन्स येथे हा दिमाखदार सोहळा पार पडला. या कार्यक्रमात जिल्ह्यातील विविध क्षेत्रांत उत्कृष्ट कार्य करणाऱ्या 13 सरपंचांचा गौरव करण्यात आला.

शारदाबाई काकफळे यांनी त्यांच्या कार्यकाळात गावात रोजगार संधी निर्माण करण्यासाठी उल्लेखनीय प्रयत्न केले. तसेच, शासनाच्या विविध कल्याणकारी योजना तळागाळातील लोकांपर्यंत पोहोचवण्यात त्यांनी सक्रिय भूमिका बजावली. त्यांच्या याच उत्कृष्ट कार्याची दखल घेत ‘लोकमत’ने त्यांचा यथोचित सन्मान केला.

या सोहळ्याला माजी मंत्री तथा आमदार बबनराव लोणीकर, जिल्हा परिषदेचे अतिरिक्त मुख्य कार्यकारी अधिकारी शिरीष बनसोडे यांच्यासह विविध मान्यवर उपस्थित होते. पुरस्कार मिळाल्यानंतर शारदाबाई काकफळे यांनी आनंद व्यक्त केला आणि या पुरस्कारामुळे आपल्याला अधिक जोमाने काम करण्याची प्रेरणा मिळाली असल्याचे सांगितले.

आमदार बबनराव लोणीकर यांनी शारदाबाई काकफळे यांचे अभिनंदन केले आणि त्यांच्या कार्याचे कौतुक केले. जिल्हा परिषदेचे अतिरिक्त मुख्य कार्यकारी अधिकारी शिरीष बनसोडे यांनीही त्यांच्या कामाची प्रशंसा केली.

‘लोकमत’च्या या उपक्रमामुळे ग्रामीण भागातील उत्कृष्ट काम करणाऱ्या सरपंचांना प्रोत्साहन मिळत आहे, अशा भावना उपस्थितांनी व्यक्त केल्या.