‘D9 News’च्या बातमीचा दणका: पारध जि. प. शाळेच्या ‘महाराजा गेट’ अन् अपूर्ण गट्टू कामाची प्रशासनाकडून तात्काळ पाहणी; नवीन गेट बसवण्याचे आदेश
By तेजराव दांडगे
‘D9 News’च्या बातमीचा दणका: पारध जि. प. शाळेच्या ‘महाराजा गेट’ अन् अपूर्ण गट्टू कामाची प्रशासनाकडून तात्काळ पाहणी; नवीन गेट बसवण्याचे आदेश
पारध बु. (विशेष प्रतिनिधी: तेजराव दांडगे / छायाचित्र: सागर देशमुख): पारध येथील जिल्हा परिषद प्राथमिक शाळेतील रखडलेले गट्टू काम, तुंबलेले पाणी आणि सुमारे १० ते ११ लाख रुपये खर्चून उभारलेल्या ‘महाराजा गेट‘ च्या निकृष्ट बांधकामामुळे विद्यार्थ्यांच्या सुरक्षेचा प्रश्न निर्माण झाला होता. या गंभीर समस्येवर ‘D9 News पोर्टल ने Online’ वृत्तांकन करत प्रशासनाचे लक्ष वेधले होते. या बातमीची तात्काळ दखल घेत समग्र शिक्षा अभियानाच्या अभियंत्यांनी आणि ग्रामसेवकांनी प्रत्यक्ष घटनास्थळी भेट देऊन पाहणी केली आहे.
अभियंत्यांकडून प्रत्यक्ष पाहणी; कंत्राटदाराला ताकीद
बातमी प्रसिद्ध झाल्यानंतर समग्र शिक्षा अभियान, भोकरदन गटसाधन केंद्राच्या अभियंता योगिता वाडेकर यांनी पारध जि. प. शाळेला भेट देऊन प्रत्यक्ष पाहणी केली. पाहणीदरम्यान गेटच्या कॉलमचे काम निकृष्ट दर्जाचे असल्याचे समोर आले. यावर त्यांनी कंत्राटदाराला तांत्रिक मानकांनुसार आणि विद्यार्थ्यांच्या सुरक्षेला प्राधान्य देऊन तात्काळ सुधारणा करण्याचे कडक निर्देश दिले.
यावेळी पारध बु. चे ग्रामविकास अधिकारी गजानन उंबरकर यांनीही उपस्थित राहून परिसराची पाहणी केली आणि रखडलेली कामे तातडीने पूर्ण करण्याचे आश्वासन दिले.
येत्या २-३ दिवसांत पेव्हर ब्लॉक पूर्ण अन् नवीन ‘स्लाइडिंग गेट’ बसणार!
ग्रामविकास अधिकारी गजानन उंबरकर यांनी दिलेल्या माहितीनुसार:
- पेव्हर ब्लॉक काम: शाळा परिसरातील प्रलंबित असलेले गट्टू (पेव्हर ब्लॉक) बसवण्याचे काम पुढील २ ते ३ दिवसांत पूर्ण केले जाईल.
- नवे स्लाइडिंग गेट: सध्याचे धोकादायक गेट काढून त्याऐवजी अधिक मजबूत आणि सुरक्षित ‘स्लाइडिंग गेट’ बसवण्यात येणार आहे.
- गुणवत्तेवर भर: कामाच्या गुणवत्तेबाबत कोणतीही तडजोड केली जाणार नाही, अशी कडक ताकीद संबंधित कंत्राटदारास देण्यात आली आहे.
काय म्हणाले अधिकारी?
कॉलमचे काम निकृष्ट; तात्काळ दुरुस्तीच्या सूचना > “पारध जि. प. शाळेच्या ‘महाराजा गेट’ची प्रत्यक्ष पाहणी केली असता कॉलमचे बांधकाम निकृष्ट दर्जाचे असल्याचे आढळले. कंत्राटदाराने तांत्रिक मानकांनुसार दर्जेदार काम करून विद्यार्थ्यांच्या सुरक्षिततेला प्राधान्य द्यावे, अशा सूचना दिल्या आहेत.” > — योगिता वाडेकर (अभियंता, समग्र शिक्षा अभियान, भोकरदन)
नवे स्लाइडिंग गेट अन् गट्टू काम २-३ दिवसांत पूर्ण करणार > “शाळेतील विकासकामे प्राधान्याने पूर्ण केले जातील. पेव्हर ब्लॉकचे काम येत्या २-३ दिवसांत पूर्ण होईल. तसेच धोकादायक गेट काढून तिथे नवीन स्लाइडिंग गेट बसवले जाईल.” > — गजानन उंबरकर (ग्रामविकास अधिकारी, ग्रामपंचायत पारध बु.)
सार्वजनिक निधीतून होणाऱ्या कामात पारदर्शकता हवी > “D9 News, दैनिक पुढारी, दैनिक आनंद नगरी ने उपस्थित केलेल्या प्रश्नाची प्रशासनाने तातडीने दखल घेतल्याबद्दल समाधान आहे. मात्र केवळ आश्वासन न देता शाळेत मजबूत व दर्जेदार स्लाइडिंग गेट लवकरात लवकर बसवून विद्यार्थ्यांची सुरक्षितता सुनिश्चित करावी. सार्वजनिक निधीतून होणाऱ्या प्रत्येक कामात गुणवत्ता आणि पारदर्शकता राखली जावी, हीच अपेक्षा आहे.” > — सागर देशमुख (सामाजिक कार्यकर्ता, पारध
ग्रामस्थांकडून समाधान व्यक्त
’D9 News’ने विद्यार्थ्यांच्या सुरक्षेचा प्रश्न मांडल्यानंतर प्रशासनाने दाखवलेल्या तत्परतेबद्दल पारध येथील ग्रामस्थ व पालकांनी समाधान व्यक्त केले आहे. दिलेल्या आश्वासनांची लवकरात लवकर अंमलबजावणी होऊन विद्यार्थ्यांचा प्रवास सुरक्षित व्हावा, अशी अपेक्षा आता व्यक्त केली जात आहे. (D9 news पोर्टल वर या आधीची प्रसिद्ध झालेली खालील बातमीची लिंक)
