“मुलांनी निर्भय बनावे आणि पालकांनी मुलांशी मैत्रीचे नाते जपावे!” – पोलीस हवालदार प्रकाश शिनकर

​“मुलांनी निर्भय बनावे आणि पालकांनी मुलांशी मैत्रीचे नाते जपावे!” – पोलीस हवालदार प्रकाश शिनकर

विद्यार्थी सुरक्षा आणि संस्कारांची शिदोरी: पारध पोलिसांकडून धावडा परिसरात भव्य जनजागृती मोहीम

धावडा, दि. १७ (जालना): सध्याच्या धावपळीच्या आणि तंत्रज्ञानाच्या युगात विद्यार्थ्यांचे भवितव्य सुरक्षित राहावे आणि त्यांच्यावर सुसंस्कार व्हावेत, या उद्देशाने पारध पोलीस ठाण्याच्या वतीने धावडा आणि शेलूद परिसरातील विविध शाळांमध्ये ‘सुरक्षा मंत्र’ आणि ‘विद्यार्थी मार्गदर्शन’ अभियान राबवण्यात आले.

दिनांक १७ डिसेंबर २०२५ रोजी, पोलीस अधीक्षक (जालना) आणि अप्पर पोलीस अधीक्षक (जालना) यांच्या मार्गदर्शनाखाली, सहाय्यक पोलीस निरीक्षक संतोषजी माने यांच्या आदेशानुसार पोलीस हवालदार प्रकाश शिनकर यांनी या मोहिमेचे आयोजन केले होते.

विविध विषयांवर सखोल मार्गदर्शन

या मोहिमेअंतर्गत धावडा येथील श्री रावसाहेब पाटील दानवे माध्यमिक आश्रम शाळा, शिवाजी माध्यमिक व उच्च माध्यमिक विद्यालय, श्री रावसाहेब पाटील दानवे प्राथमिक शाळा, राजकुंवर कॉलेज, जिल्हा परिषद प्रशाला आणि शेलूद येथील सरस्वती विद्यालय अशा एकूण ६ शिक्षण संस्थांमधील २८०० विद्यार्थ्यांशी संवाद साधण्यात आला. यावेळी खालील विषयांवर मार्गदर्शन करण्यात आले:

सुरक्षा आणि कायदा: गुड टच-बॅड टच, पोस्को (POCSO) कायदा आणि स्वसंरक्षण

 १) सायबर सुरक्षा: मोबाईलचे फायदे-तोटे, सायबर फसवणूक आणि सोशल मीडियाचा मर्यादित वापर.

 २) व्यसनमुक्ती: विद्यार्थ्यांमध्ये वाढणारी छुप्या पद्धतीची व्यसने आणि त्यांचे दुष्परिणाम.

 ३) ताण-तणाव व्यवस्थापन: शालेय जीवनातील ताण आणि अपघातांपासून बचाव.

‘सुरक्षा मंत्र’ पुस्तकाचे वाटप

जालना पोलीस दलातर्फे प्रकाशित करण्यात आलेले ‘सुरक्षा मंत्र: आधुनिक जगात एक पाऊल पुढे’ हे पुस्तक विद्यार्थ्यांना वाचण्यासाठी देण्यात आले. “या पुस्तकातील सुरक्षा विषयक मुद्द्यांचे आत्मसात केल्यास कोणतीही अप्रिय घटना टाळता येईल,” असा विश्वास हवालदार प्रकाश शिनकर यांनी व्यक्त केला.

अध्यात्म आणि संस्कारांची जोड

केवळ कायदाच नव्हे, तर विद्यार्थ्यांमध्ये नैतिक मूल्ये रुजवण्यासाठी त्यांनी संत ज्ञानेश्वरी वाचनाचे महत्त्व पटवून दिले. “अभ्यासाची सुरुवात करण्यापूर्वी ज्ञानेश्वरीचा किमान एक अध्याय वाचावा. यातून संत ज्ञानेश्वर, मुक्ताबाई, निवृत्तीनाथ आणि सोपानदेव यांच्यातील बंधुप्रेम आणि जीवन जगण्याची खरी वृत्ती लक्षात येईल,” असे आवाहन त्यांनी केले. महापुरुषांचे चरित्र वाचन आणि मैदानी खेळांकडे वळण्याचा सल्लाही यावेळी देण्यात आला.

पालकांसाठी महत्त्वाचा संदेश

“आई-वडील शेतात कष्ट करून मुलांचे भविष्य घडवत असतात. मुलांनी त्यांच्याशी कधीही खोटे बोलू नये. जर कोणी विनाकारण त्रास देत असेल किंवा पाठलाग करत असेल, तर निर्भयपणे पालकांना, शिक्षकांना किंवा पोलिसांच्या ‘११२’ या क्रमांकावर तात्काळ कळवावे,” असे आवाहन पोलिसांनी केले. पालकांनीही घरी आल्यावर मुलांच्या प्रगतीकडे आणि मोबाईल वापराकडे बारकाईने लक्ष द्यावे, असे सुचवण्यात आले.

या उपक्रमादरम्यान सर्व शाळांना आपले सीसीटीव्ही (CCTV) कॅमेरे अद्यावत ठेवण्याच्या सूचना देण्यात आल्या, जेणेकरून विद्यार्थ्यांच्या सुरक्षेवर चोवीस तास लक्ष राहील. पोलिसांच्या या स्तुत्य उपक्रमाचे सर्वत्र कौतुक होत आहे.