अंबडमध्ये प्रशासनाचा मोठा छापा! शालेय पोषण आहाराच्या ६.३७ लाखांच्या धान्याचा काळाबाजार उघड; एकावर गुन्हा दाखल
By तेजराव दांडगे
अंबडमध्ये प्रशासनाचा मोठा छापा! शालेय पोषण आहाराच्या ६.३७ लाखांच्या धान्याचा काळाबाजार उघड; एकावर गुन्हा दाखल
अंबड (जि. जालना): शासकीय योजना आणि शालेय पोषण आहारासाठी वापरण्यात येणाऱ्या गहू व तांदळाचा साठा काळ्या बाजारात बेकायदेशीररित्या विक्री करण्याचा एक मोठा डाव प्रशासनाने उधळून लावला आहे. पोलीस आणि महसूल विभागाने संयुक्त कारवाई करत तब्बल ६ लाख ३७ हजार ४१८ रुपयांचा मुद्देमाल जप्त केला असून, याप्रकरणी गोदाम मालकाविरुद्ध गुन्हा दाखल करण्यात आला असल्याची माहिती जिल्हा प्रशासनाने दिली आहे.
गोपनीय माहितीवरून रात्री पडला छापा
मिळालेल्या माहितीनुसार, १६ जुलै २०२६ रोजी सायंकाळी पुरवठा व महसूल विभागाला अंबड येथील चांगले नगर भागातील एका खाजगी पत्र्याच्या गोदामात बेकायदेशीर धान्याचा साठा लपवून ठेवल्याची गोपनीय माहिती मिळाली होती. या माहितीच्या आधारे जिल्हाधिकारी आशिमा मित्तल यांच्या मार्गदर्शनाखाली पथकाने पोलीस कर्मचाऱ्यांसह रात्री ७.४५ वाजता गोदामावर छापा टाकला. गोदामाच्या दरवाजाला कुलूप असल्याने आणि मालक शेख नसीर अब्बास बागवान (रा. अंबड) यांच्याशी संपर्क होऊ न शकल्याने, पंचांसमक्ष कुलूप तोडून आत प्रवेश करण्यात आला.
गोदामातून लाखो रुपयांचा धान्यसाठा जप्त
तपासणी दरम्यान गोदामात कोणताही वैध परवाना किंवा अधिकृत नोंद नसलेला खालील मुद्देमाल आढळून आला, जो प्रशासनाने जप्त केला आहे:
- गहू: १८९ गोण्या (एकूण ९४.५० क्विंटल) – अंदाजे किंमत २ लाख ९७ हजार ७०२ रुपये.
- तांदूळ: १५२ गोण्या (एकूण ७६ क्विंटल) – अंदाजे किंमत ३ लाख ३३ हजार ७१६ रुपये.
- इतर साहित्य: शासकीय धान्य वितरणासाठी वापरली जाणारी ८० रिकामी पोती आणि ६ हजार ५०० रुपये किमतीचा एक इलेक्ट्रॉनिक वजन काटा.
एकूण जप्त मुद्देमाल: ६ लाख ३७ हजार ४१८ रुपये.
अत्यावश्यक वस्तू अधिनियमांतर्गत गुन्हा दाखल
या बेकायदेशीर साठवणुकीप्रकरणी तहसील कार्यालय अंबड येथील निरीक्षण अधिकारी किरणकुमार शत्रुघ्न खांडेभराड यांनी दिलेल्या फिर्यादीवरून आरोपी शेख नसीर अब्बास बागवान याच्याविरुद्ध अंबड पोलीस ठाण्यात अत्यावश्यक वस्तू अधिनियम, १९५५ च्या कलम ३ आणि ७ अन्वये गुन्हा (रजि. नं. ०५२८/२०२६) दाखल करण्यात आला आहे.
जिल्हाधिकारी आशिमा मित्तल यांच्या मार्गदर्शनाखाली ही मोठी कारवाई करण्यात आली असून, या प्रकरणाचा पुढील तपास पोलीस उपनिरीक्षक (SI) भगवान नरोडे करत आहेत. शासकीय धान्याचा असा अपहार करणाऱ्यांवर प्रशासनाने उगारलेल्या या बडग्यामुळे काळ्याबाजार करणाऱ्यांचे धाबे दणाणले आहेत.
