वाढोणा डोंगरात बेकायदेशीर मुरुम उत्खननावर पोलिसांचा छापा; २२ लाखांचा मुद्देमाल जप्त

वाढोणा डोंगरात बेकायदेशीर मुरुम उत्खननावर पोलिसांचा छापा; २२ लाखांचा मुद्देमाल जप्त

पारध (विशेष बातमीदार): पारध पोलीस ठाण्याच्या हद्दीतील वाढोणा येथील डोंगर भागात चालणाऱ्या बेकायदेशीर मुरुम उत्खनन आणि वाहतुकीवर पोलिसांनी मोठी कारवाई केली आहे. ८ सप्टेंबरच्या रात्री ते ९ सप्टेंबरच्या पहाटे दरम्यान ही कारवाई करण्यात आली असून, घटनास्थळावरून सुमारे २२ लाख ३ हजार रुपयांचा मुद्देमाल जप्त करण्यात आला आहे.

८ ते ९ सप्टेंबरच्या रात्री कारवाई मिळालेल्या माहितीनुसार, वाढोणा येथील डोंगर भागात विनापरवाना मुरुमाचे खोदकाम करून त्याची वाहतूक केली जात असल्याची माहिती पोलिसांना मिळाली होती. या माहितीच्या आधारे पारध पोलिसांनी घटनास्थळी छापा टाकला. पोलीस पथकाला पाहताच काही ट्रॅक्टर चालक तेथून फरार झाले, मात्र पोलिसांनी जेसीबी चालकाला ताब्यात घेतले.

जप्त केलेला मुद्देमाल:

• जेसीबी (JCB ECO XPERT): अंदाजे किंमत १५ लाख रुपये
• सोनालिका ट्रॅक्टर व ट्रॉली: अंदाजे किंमत ७ लाख रुपये
• ट्रॉलीतील मुरुम: ३ हजार रुपये
• एकूण जप्त ऐवज: २२ लाख ३ हजार रुपये

आरोपीतांवर गुन्हा दाखल या प्रकरणात पोलिसांनी जेसीबी चालक ईश्वर पांडुरंग चंडोल (वय ३१, रा. वडाळी, ता. सिल्लोड, जि. छत्रपती संभाजीनगर) याला ताब्यात घेतले असून त्याच्यासह पळून गेलेल्या इतर सहकाऱ्यांवर भारतीय न्याय संहिता (BNS) २०२३ मधील संबंधित कलमांनुसार गुन्हा दाखल केला आहे.

पारध पोलीस ठाण्याचे अंमलदार सुनील जाधव यांच्या फिर्यादीवरून हा गुन्हा नोंदवण्यात आला असून, सहाय्यक पोलीस उपनिरीक्षक जायभाये या प्रकरणाचा पुढील तपास करत आहेत.