जालन्यात सामाजिक न्याय विभागाच्या शासकीय निवासी शाळांमध्ये ‘प्रवेशोत्सव’ उत्साहात; विद्यार्थिनींना मोबाईल टॅब आणि पुस्तकांचे वाटप
By तेजराव दांडगे
जालन्यात सामाजिक न्याय विभागाच्या शासकीय निवासी शाळांमध्ये ‘प्रवेशोत्सव’ उत्साहात; विद्यार्थिनींना मोबाईल टॅब आणि पुस्तकांचे वाटप
जालना: जालना जिल्ह्यातील सामाजिक न्याय व विशेष सहाय्य विभागांतर्गत येणाऱ्या शासकीय निवासी शाळांमध्ये नवीन शैक्षणिक वर्षाच्या पहिल्या दिवशी ‘प्रवेशोत्सव’ मोठ्या उत्साहात साजरा करण्यात आला. या प्रसंगी शाळेत पहिल्यांदाच पाऊल ठेवणाऱ्या विद्यार्थ्यांचे स्वागत करण्यात आले, तसेच विद्यार्थिनींना आधुनिक शिक्षणासाठी शालेय पुस्तकांसह मोबाईल टॅबचेही वाटप करण्यात आले.
जिल्ह्यात सध्या अनुसूचित जाती व नवबौद्ध घटकांच्या मुलींची शासकीय निवासी शाळा (जालना), मुलांची शासकीय निवासी शाळा (बदनापूर) आणि मुलांची शासकीय निवासी शाळा (भोकरदन) अशा एकूण तीन शासकीय निवासी शाळा यशस्वीरीत्या कार्यान्वित आहेत.
📱 डिजिटल शिक्षणाचा श्रीगणेशा: मोबाईल टॅबचे वाटप
१५ जून २०२६ रोजी जिल्ह्यातील या तिन्ही निवासी शाळांमध्ये शैक्षणिक वर्षाची सुरुवात एका आगळ्यावेगळ्या प्रवेशोत्सवाने झाली. जालना येथील अनुसूचित जाती व नवबौद्ध घटकांच्या मुलींच्या शासकीय निवासी शाळेमध्ये प्रवेशित विद्यार्थिनींना मान्यवरांच्या हस्ते शालेय पुस्तके आणि आधुनिक शिक्षणाची गरज ओळखून मोबाईल टॅबचे वाटप करण्यात आले. शासनाच्या या उपक्रमामुळे ग्रामीण भागातील गरजू व वंचित घटकातील विद्यार्थ्यांना डिजिटल शिक्षणाची दारे खुली झाली आहेत.
👥 मान्यवरांची प्रमुख उपस्थिती
या शासकीय निवासी शाळांमधील प्रवेशोत्सव सोहळ्या दरम्यान विविध विभागातील वरिष्ठ अधिकारी आणि शैक्षणिक कर्मचारी मोठ्या संख्येने उपस्थित होते. यामध्ये प्रामुख्याने: डॉ. अनिता राठोड (विशेष अधिकारी, शा.नि.शा.), स्नेहल मोदाळे (समाजकल्याण विभाग), संदिप कांबळे (समाजकल्याण विभाग), सूर्यकला गोसावी (मुख्याध्यापिका), भावना चौधरी (अधिक्षका) यांच्यासह निवासी शाळेतील सर्व सहाय्यक शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते
