अन्नपदार्थांतील भेसळीविरुद्ध प्रशासन आक्रमक; आयुक्त तुकाराम मुंढे यांच्या मार्गदर्शनाखाली FDA कडून टोल-फ्री क्रमांक जारी
नागरिक आता थेट करू शकणार तक्रार
अन्नपदार्थांतील भेसळीविरुद्ध प्रशासन आक्रमक; आयुक्त तुकाराम मुंढे यांच्या मार्गदर्शनाखाली FDA कडून टोल-फ्री क्रमांक जारी
मुंबई/जालना: राज्यातील नागरिकांना शुद्ध, दर्जेदार आणि सुरक्षित अन्नपदार्थ मिळावेत यासाठी अन्न व औषध प्रशासन (FDA) विभाग पूर्णपणे सक्रिय झाला आहे. नवनयुक्त एफडीए आयुक्त तुकाराम मुंढे यांनी पदभार स्वीकारताच राज्यातील भेसळ करणाऱ्या घटकांविरुद्ध व्यापक मोहीम सुरू केली आहे. या मोहिमेचा पुढील टप्पा म्हणून, नागरिकांच्या थेट सहभागातून अन्न सुरक्षेचे जाळे बळकट करण्यासाठी प्रशासनाने एक महत्त्वाचे पाऊल उचलले असून अधिकृत टोल-फ्री क्रमांक आणि ई-मेल आयडी जारी केला आहे.
बाजारपेठेतील अन्नपदार्थ, दुग्धजन्य पदार्थ किंवा फळांच्या दर्जाबाबत नागरिकांच्या मनात कोणतीही शंका असल्यास, त्यांना आता थेट प्रशासनाकडे आपली तक्रार नोंदवता येणार आहे. महाराष्ट्र शासनाच्या ‘आपले सरकार’ उपक्रमांतर्गत ही संपर्क सुविधा जनतेसाठी खुली करण्यात आली आहे.
नागरिकांसाठी अधिकृत संपर्क तपशील:
अन्न व औषध प्रशासनाकडे थेट संपर्क साधण्यासाठी खालील अधिकृत माध्यमांचा वापर करता येईल:
📞 टोल फ्री क्रमांक: 1800222365
✉️ ई-मेल आयडी: jc-foodhq@gov.in
तक्रार नोंदवताना ‘या’ दोन गोष्टी नमूद करणे आवश्यक:
प्रशासनाने जारी केलेल्या माहितीनुसार, नागरिकांनी तक्रार नोंदवताना खालील तपशील अचूकपणे देणे गरजेचे आहे, जेणेकरून अन्न सुरक्षा अधिकाऱ्यांना तातडीने तपास करणे शक्य होईल:
१. संबंधित आस्थापनेचा अचूक पत्ता: ज्या दुकान, हॉटेल, डेअरी, बेकरी, गोदामात किंवा कारखान्याविरुद्ध तक्रार करायची आहे, त्याचा पूर्ण पत्ता.
२. अन्नपदार्थाची किंवा फळांची माहिती: नेमक्या कोणत्या अन्नपदार्थात (उदा. तूप, तेल, दूध, मावा) किंवा कोणत्या फळांमध्ये (उदा. केमिकलद्वारे पिकवलेले आंबे, केळी आदी) भेसळ असल्याचा संशय आहे, त्याचे नाव स्पष्ट करावे.
तक्रारदाराची माहिती पूर्णपणे गोपनीय राहणार
अनेकदा स्थानिक दबाव किंवा इतर कारणांमुळे नागरिक तक्रार करण्यास पुढे येत नाहीत. ही बाब लक्षात घेऊन आयुक्त तुकाराम मुंढे यांच्या निर्देशानुसार प्रशासनाने स्पष्ट केले आहे की, माहिती देणाऱ्या किंवा तक्रार करणाऱ्या कोणत्याही नागरिकाचे नाव, मोबाईल क्रमांक आणि ओळख पूर्णपणे गोपनीय ठेवली जाईल.
”भेसळखोरीविरुद्ध जनतेचा सहभाग, स्वच्छ अन्न हेच आमचं ध्येय!” या ब्रीदवाक्याला सार्थ ठरवण्यासाठी सजग नागरिकांनी या सुविधेचा वापर करून प्रशासनाला सहकार्य करावे, असे आवाहन अन्न व औषध प्रशासनातर्फे करण्यात आले आहे.
