जालना : पद्मावती येथे कौटुंबिक वादातून विवाहितेला मारहाण; पती आणि सासऱ्यावर पारध पोलिसांत गुन्हा दाखल
By तेजराव दांडगे
जालना : पद्मावती येथे कौटुंबिक वादातून विवाहितेला मारहाण; पती आणि सासऱ्यावर पारध पोलिसांत गुन्हा दाखल
पारध (भोकरदन): कौटुंबिक वादातून एका २६ वर्षीय विवाहितेला चामडी बेल्ट आणि लाथाबुक्क्यांनी मारहाण करून जीवे मारण्याची धमकी दिल्याचा धक्कादायक प्रकार भोकरदन तालुक्यातील पद्मावती येथे समोर आला आहे. या प्रकरणी पीडित महिला ज्योती सागर दांडगे यांच्या तक्रारीवरून पारध पोलीस ठाण्यात पती आणि सासऱ्यावर भारतीय न्याय संहिता (BNS) अंतर्गत विविध कलमांन्वये गुन्हा दाखल करण्यात आला आहे.
पहिल्या पतीच्या मुलांच्या कारणावरून वाद
पोलीस सूत्रांकडून मिळालेल्या माहितीनुसार, पद्मावती येथील रहिवासी ज्योती दांडगे (वय २६, व्यवसाय: घरकाम व शेती) यांचा विवाह सागर गोविंदा दांडगे यांच्याशी झालेला आहे. फिर्यादी महिलेच्या पहिल्या पतीपासून असलेल्या दोन मुलींच्या नांदवण्याच्या व वागण्याच्या कारणावरून पती आणि सासरच्या लोकांसोबत वाद सुरू होता.
दिनांक १ जून २०२६ रोजी रात्री ९:०० वाजेच्या सुमारास याच कारणावरून घरात पुन्हा वाद झाला. यावेळी आरोपींनी संगणमत करून पीडितेला जबर मारहाण केली.
बेल्टने मारहाण करत दिल्या धमक्या
वादाचे रूपांतर हाणामारीत झाल्यानंतर आरोपीत पती सागर गोविंदा दांडगे याने हातातील चामडी बेल्टने पत्नीच्या डोक्यात डाव्या बाजूला मारून दुखापत केली, ज्यामध्ये त्या रक्तबंबाळ झाल्या. याशिवाय पाठीवर आणि उजव्या खांद्यावरही बेल्टने मारहाण करण्यात आली. तसेच दोन्ही आरोपींनी संगणमत करून पीडितेला लाथाबुक्क्यांनी मारहाण करत शिवीगाळ केली आणि जीवे मारण्याची धमकी दिली. या घटनेदरम्यान मध्यस्थी करणाऱ्या साक्षीदारांनाही आरोपींकडून धमकावण्यात आले.
पारध पोलिसांत गुन्हा दाखल; तपास सुरू
या घटनेनंतर पीडित महिलेचा ‘एम.एल.सी.’ (MLC) जबाब पोलीस अंमलदार मिनकर यांनी पारध पोलीस ठाण्यात हजर केला. त्यानुसार सहाय्यक पोलीस निरीक्षक (सपोनि) संतोष माने यांच्या आदेशाने पारध पोलीस ठाण्यात गुन्हा रजि. नं. १६७/२०२६, कलम ११८(१), ११५(२), ३५१(२), ३५२, ३(५) बी.एन.एस. २०२३ (BNS) अन्वये गुन्हा दाखल करण्यात आला आहे.
गुन्हा दाखल करणारे: पोलीस हेड कॉन्स्टेबल (११३८) एस. सी. खिल्लारे
पुढील तपास: पोलीस हेड कॉन्स्टेबल (४९८) पी. एन. सिनकर करत आहेत.
