पारधमध्ये चैत्र नवरात्र उत्सवाचा जल्लोष; पारंपरिक ‘स्वाऱ्यांची’ ऐतिहासिक परंपरा भक्तिमय वातावरणात संपन्न
By तेजराव दांडगे
पारधमध्ये चैत्र नवरात्र उत्सवाचा जल्लोष; पारंपरिक ‘स्वाऱ्यांची’ ऐतिहासिक परंपरा भक्तिमय वातावरणात संपन्न
पारध/भोकरदन (प्रतिनिधी): भोकरदन तालुक्यातील ऐतिहासिक वारसा लाभलेल्या पारध येथे चैत्र नवरात्र उत्सव आणि पारंपरिक ‘स्वाऱ्यांची’ गौरवशाली परंपरा यंदाही मोठ्या भक्तिभावात साजरी करण्यात आली. अनेक पिढ्यांपासून चालत आलेल्या या परंपरेमुळे संपूर्ण पारध नगरी भक्तिमय वातावरणात न्हाऊन निघाली होती.
महादेव आणि पार्वतीची स्वारी: ‘हर हर महादेव’चा जयघोष
चैत्र महिन्यातील कामदा एकादशीच्या उत्तररात्री नंदी महादेवाची स्वारी काढण्यात आली. “हर हर महादेव”च्या जयघोषात निघालेल्या या स्वारीत अमोल देशमुख यांनी महादेवाची, तर रोहन लोखंडे यांनी पार्वतीची स्वारी साकारली. या दोन्ही स्वाऱ्यांनी भाविकांचे लक्ष वेधून घेतले.
आदिशक्ती देवीची स्वारी आणि ऐतिहासिक वारसा
उत्सवाच्या दुसऱ्या दिवशी आदिशक्ती देवीची पारंपरिक स्वारी काढण्यात आली. या परंपरेत पप्पू कुलकर्णी यांच्या घराण्याला विशेष मानाचे स्थान आहे. दरवर्षीप्रमाणे यंदाही कुलकर्णी यांच्या निवासस्थानी विधिवत पूजन करून स्वारीला प्रारंभ झाला. शिवराज कुलकर्णी यांनी स्वारीचे मुकुट, नंदी आणि इतर साहित्याचे आकर्षक डिझाइन केले होते. यंदा देवीची स्वारी विष्णू बेराड यांनी भावपूर्ण रितीने घेतली.
सहकार्य आणि सजावट
स्वारी अधिक भव्य आणि देखणी होण्यासाठी मंगेश आंबेकर, वामन लोखंडे, संजय लोखंडे, मनोज जोशी, पप्पू कुलकर्णी आणि रमेश अंबेकर यांनी विशेष परिश्रम घेतले. देवीचे अलंकार आणि सजावटीमुळे उत्सवाची शोभा अधिकच वाढली होती.
मान्यवरांची उपस्थिती
या धार्मिक सोहळ्याप्रसंगी बालाजी संस्थानचे अध्यक्ष दिलीप बेराड, सचिव बंकिमचंद्र लोखंडे, सुभाष तबडे, देविदास तेलंग्रे आणि समाधान लोखंडे गुरुजी यांच्यासह गावातील प्रतिष्ठित नागरिक व भाविक मोठ्या संख्येने उपस्थित होते.
