पारधमध्ये ‘आमरण उपोषणा’चा दणका! पहिल्याच दिवशी ८ कोटींच्या रस्ते कामाला प्रत्यक्ष सुरुवात; २० कोटींच्या निधीतून अनवा-हिसोडा मार्गही लवकरच मार्गी!

पारधमध्ये ‘आमरण उपोषणा’चा दणका! पहिल्याच दिवशी ८ कोटींच्या रस्ते कामाला प्रत्यक्ष सुरुवात; २० कोटींच्या निधीतून अनवा-हिसोडा मार्गही लवकरच मार्गी!

​पारध, दि. ०४ (जालना): प्रलंबित विकासकामांच्या मागणीसाठी पारध ग्रामपंचायतीच्या वतीने उपसरपंच शेखर श्रीवास्तव यांच्या नेतृत्वात सुरू करण्यात आलेल्या आमरण उपोषणाची प्रशासनाने पहिल्याच दिवशी गंभीर दखल घेतली आहे. बुधवारी उपोषणस्थळी महावितरण, सार्वजनिक बांधकाम विभाग (PWD) आणि शिक्षण विभागाच्या वरिष्ठ अधिकाऱ्यांनी भेटी देऊन आंदोलकांशी चर्चा केली. आंदोलनाचा रेटा पाहता, रखडलेल्या ८ कोटींच्या पारध-धामणगाव रस्ते कामाला आणि महावितरणच्या कामाला प्रत्यक्ष सुरुवात झाल्याचे पाहाव्यास मिळाले.

​दोन वर्षांपासून रखडलेला रस्ता मार्गी:

यावेळी माहिती देताना शिवसेना (उबाठा) उपजिल्हाप्रमुख मनीष श्रीवास्तव म्हणाले की, “लेहा-पारध खुर्द-पारध बु.-धामणगाव या रस्त्यासाठी ८ कोटी रुपयांचा निधी दोन वर्षांपूर्वीच मंजूर झाला होता. मात्र, प्रशासकीय दिरंगाईमुळे हे काम सुरू होत नव्हते. आम्ही उपोषणाचा इशारा देताच आज या कामाला प्रत्यक्ष सुरुवात करण्यात आली आहे.”

​२० कोटींच्या कामाचेही मिळाले आश्वासन:

रस्त्यांच्या कामाबाबत अधिक माहिती देताना श्रीवास्तव यांनी सांगितले की, अनवा, जळगाव सपकाळ, हिसोडा, लेहा, पारध, धामणगाव या रस्त्यासाठी एकूण २० कोटींचा निधी मंजूर आहे. यापैकी अनवा ते हिसोडा पर्यंतच्या कामाला यावर्षी मंजुरी मिळाली असून, हे कामही लवकरच सुरू होणार असल्याचे प्रशासनाकडून सांगण्यात आले आहे.

​मागण्या पूर्ण होईपर्यंत उपोषण सुरूच राहणार:

प्रशासनाने ८ कोटींच्या कामाला सुरुवात केली असली तरी, २० कोटींच्या कामाची प्रत्यक्ष सुरुवात आणि इतर मागण्या जोपर्यंत लेखी स्वरूपात पूर्ण होत नाहीत, तोपर्यंत उपसरपंच शेखर श्रीवास्तव यांच्या नेतृत्वात हे आमरण उपोषण सुरूच राहील, अशी ठाम भूमिका ग्रामस्थांनी घेतली आहे.

​यावेळी महावितरणचे उपविभागीय अधिकारी, PWD चे उपविभागीय अधिकारी आणि गटशिक्षण अधिकारी कार्यालय, भोकरदन येथील प्रतिनिधी उपस्थित होते. प्रशासनाच्या या तातडीच्या हालचालींमुळे ग्रामस्थांच्या आशा पल्लवित झाल्या आहेत.