पारध येथे माकडाच्या हल्ल्यात ७० वर्षीय वृद्ध महिला गंभीर जखमी; वन विभागाने तात्काळ बंदोबस्त करण्याची गावकऱ्यांची मागणी
By तेजराव दांडगे
पारध येथे माकडाच्या हल्ल्यात ७० वर्षीय वृद्ध महिला गंभीर जखमी; वन विभागाने तात्काळ बंदोबस्त करण्याची गावकऱ्यांची मागणी
भोकरदन / पारध: पारध येथे माकडांच्या वाढत्या त्रासातून एक धक्कादायक घटना समोर आली आहे. गुरुवारी (दि. ३) एका माकडाने अचानक हल्ला करून ७० वर्षीय वृद्ध महिलेस गंभीर जखमी केले. या घटनेमुळे परिसरात नागरिकांमध्ये आणि विशेषतः लहान मुलांच्या सुरक्षेबाबत भीतीचे वातावरण निर्माण झाले आहे.
बाळाला वाचवताना घडला प्रकार
घटना घडली त्या वेळी शेजारील ५ ते ६ महिन्यांचे लहान बाळ घराच्या मागील बाजूस होते. परिसरात माकडे आल्याचे दिसताच कडुबाई राजाराम सुरडकर (वय ७० वर्ष) यांनी तत्परता दाखवत त्या लहान बाळाला सुरक्षितपणे घरात नेण्याचा प्रयत्न केला. मात्र, बाळाला वाचवून घरात जात असतानाच एका माकडाने पाठीमागून येऊन कडुबाई यांच्या पायावर जोरदार हल्ला केला. यात त्या गंभीर जखमी झाल्या.
बुलढाणा येथे उपचार सुरू
घटनेनंतर परिसरातील स्थानिक तरुणांनी तातडीने कडुबाई सुरडकर यांना उपचारासाठी धाड येथील रुग्णालयात दाखल केले. तेथील डॉक्टरांनी प्राथमिक उपचार करून पुढील उपचारासाठी बुलढाणा येथील शासकीय रुग्णालयात हलवण्याचा सल्ला दिला. सध्या कडुबाई यांच्यावर बुलढाणा येथील शासकीय रुग्णालयात उपचार सुरू असून, डॉक्टरांनी त्यांना पुढील तीन दिवस निरीक्षणाखाली ठेवण्यासाठी ॲडमिट करून घेतले आहे.
वन विभागाने बंदोबस्त करण्याची मागणी
अचानक झालेल्या या हल्ल्यामुळे परिसरात माकडांची प्रचंड दहशत पसरली आहे. गावात पुन्हा असा कोणताही अनुचित प्रकार घडू नये आणि लहान मुले तसेच वृद्धांची सुरक्षा कायम राहावी, यासाठी वन विभागाने व प्रशासनाने या हिंस्त्र माकडांचा तात्काळ बंदोबस्त करावा, अशी जोरदार मागणी कडुबाई यांचे सुपुत्र सुरेंद्र सुरडकर यांच्यासह ग्रामस्थांनी केली आहे.
