🙏 ‘दिशा मिळाल्यास दशा टळते!’ शेलूद येथील नवचैतन्य व्यसनमुक्ती केंद्राचा स्तुत्य उपक्रम; व्यसनमुक्तांसाठी निसर्गरम्य ठिकाणी मार्गदर्शन व ‘काळजाला भिडणारे’ समुपदेशन!

🙏 ‘दिशा मिळाल्यास दशा टळते!’ शेलूद येथील नवचैतन्य व्यसनमुक्ती केंद्राचा स्तुत्य उपक्रम; व्यसनमुक्तांसाठी निसर्गरम्य ठिकाणी मार्गदर्शन व ‘काळजाला भिडणारे’ समुपदेशन!

पारध, दि. ०४: केवळ औषधोपचार नाही, तर मनोबल आणि योग्य मार्गदर्शन यावर भर देत जालना जिल्ह्यातील भोकरदन तालुक्यातील शेलूद येथील नवचैतन्य व्यसनमुक्ती केंद्राचे हभप ज्ञानेश्वर माऊली शेलूदकर यांनी व्यसनमुक्तीसाठी आलेल्या लोकांसाठी एक प्रेरणादायी उपक्रम राबवला.

आज, केंद्रातील सर्व लोकांना पद्मावती येथील अतिप्राचीन देवस्थान, जे पद्मावती (तपोवन) धरणाच्या काठावर आहे असे श्री. वाल्मिकेश्वर संस्थान (तपोवन) या निसर्गरम्य ठिकाणी अडीच किलोमीटर पायी घेऊन जाण्यात आले. या शांत आणि सकारात्मक वातावरणात त्यांना पारध येथील पोलीस अधिकारी आणि पत्रकारांच्या हस्ते विशेष मार्गदर्शन लाभले. या उपक्रमादरम्यान सर्वांसाठी जेवणाचीही उत्तम व्यवस्था करण्यात आली होती.

🗣️ ‘जगात दारूला औषध नाही, मार्गदर्शन महत्त्वाचे’ – हभप ज्ञानेश्वर माऊली शेलूदकर

व्यसनमुक्ती केंद्राचे हभप ज्ञानेश्वर माऊली शेलूदकर यांनी यावेळी आपले मत मांडले. ते म्हणाले, “खरं तर कुठलाच माणूस वाईट नाही, केवळ दिशा नसल्यामुळे लोकांची दशा होऊ लागते. आपण पोटतिडकीने यांना मार्गदर्शन केलं, तर नक्कीच त्यांच्यावर परिणाम होतो. येथे आम्ही गोळ्या-औषधे देतो, ज्यामुळे त्यांचा थर्क कमी होणे, जेवण चांगले जाणे, लिव्हरची सूज उतरणे अशा प्रक्रिया होतात, पण सर्वात महत्त्वाचे मार्गदर्शन (काउन्सलिंग) आहे.”

माऊलींनी ठामपणे सांगितले की, “जगात दारूला कुठेच औषध नाही, हा आमचा दावा आहे.” ते पुढे म्हणाले की, “आमच्या केंद्रात दीड-दीड लाख रुपयांच्या क्लिप टाकलेले, नाकात औषध टाकलेले, महाराष्ट्रातील सर्व प्रकारचे लोक आले. मनावर एखादा प्रसंग बिंबला तर या लोकांच्या मनावर परिणाम होतो आणि माणूस व्यसनातून बाहेर पडतो.”

❤️ ‘माऊलींचे प्रवचन काळजाला भिडते!’ – व्यसनमुक्त होण्यास इच्छुक व्यक्तींचे मनोगत

यावेळी मार्गदर्शन सत्राला उपस्थित असलेल्या व्यसनमुक्त होण्यास इच्छुक व्यक्तींनी आपले अनुभव सांगितले.
१) पहिल्या व्यक्तीने सांगितले की, “शेलूदकर माऊलींचे प्रवचनच असे आहे, की ते एकदम माणसाच्या काळजाला भिडते. माझे येथे मन रमले. माऊलींनी मला २१ दिवस नाही, तर दोन-तीन महिने येथे ठेवावे, कारण या प्रवचनाने माझी बुद्धी खूप विकसित होईल.”
२) दुसऱ्या व्यक्तीने सांगितले, “माऊलींच्या मार्गदर्शनामुळे मला घरच्या लोकांची काळजी वाटतेय आणि मला आता दारू प्यावीशी वाटत नाही.”
३) तिसऱ्या व्यक्तीने सांगितले की, माऊलींची काउन्सलिंग अशी आहे की, माझ्या मनावर खूप परिणाम झाला आणि मी दारू न पिता आनंदात राहू शकतो. “परंतु माझ्या घरच्या लोकांचा विश्वास जिंकायला मला वेळ लागेल आणि तो मी जिंकेन,” असा आत्मविश्वास त्यांनी व्यक्त केला.
४) चौथ्या व्यक्तीने सांगितले की, त्यांचे दारूमुळे पैसे व्यर्थ वाया जायचे, हे येथे आल्यावर माऊलींच्या मार्गदर्शनामुळे कळले.

यावेळी नवचैतन्य व्यसनमुक्ती केंद्राचे हभप ज्ञानेश्वर माऊली शेलूदकर, संस्थांनचे पिठाधीश महंत शिवाजी महाराज, पारध पोलीस स्टेशनचे API संतोष माने, पद्मावती येथील माजी सरपंच रमेश तराळ, तसेच मराठी पत्रकार संघांचे तालुका उपाध्यक्ष रवी लोखंडे, केंद्रीय पत्रकार संघांचे जिल्हाध्यक्ष विशाल आस्वार, पत्रकार तेजराव दांडगे आदी मान्यवर उपस्थित होते.

हा उपक्रम व्यसनमुक्तीच्या प्रवासात शारीरिक उपचारांसोबत मानसिक आणि भावनिक आधार किती महत्त्वाचा आहे, हे अधोरेखित करतो.