पारधमध्ये आग्या मोहोळाचा थरार; मधमाश्यांच्या हल्ल्यात कामगार गंभीर, ५ जण जखमी
By तेजराव दांडगे
पारधमध्ये आग्या मोहोळाचा थरार; मधमाश्यांच्या हल्ल्यात कामगार गंभीर, ५ जण जखमी
पारध, दि. ०६ (प्रतिनिधी): भोकरदन तालुक्यातील पारध बुद्रुक येथे जिल्हा परिषद शाळेसमोरील इमारतीवर असलेल्या आग्या मोहोळाने आज रौद्र रूप धारण केले आहे. सकाळपासून वेगवेगळ्या वेळी झालेल्या मधमाश्यांच्या हल्ल्यात पाच जण जखमी झाले असून, एका कामगाराची प्रकृती गंभीर असल्याने त्यांना पुढील उपचारासाठी छत्रपती संभाजीनगर येथे हलवण्यात आले आहे.
सकाळपासून सलग तीन घटना
आज सकाळपासून या परिसरातील मधमाश्या प्रचंड आक्रमक झाल्या असून त्यांनी नागरिकांवर एकामागून एक हल्ले चढवले:
१. पहिली घटना: सकाळी गजानन दांडगे आणि त्यांचा मुलगा रस्त्यावरून जात असताना माश्यांनी त्यांच्यावर अचानक हल्ला केला.
२. दुसरी घटना: थोड्याच वेळात दौलत खा पठाण हे देखील मधमाश्यांच्या हल्ल्यात जखमी झाले.
३. तिसरी घटना: संबंधित इमारतीमध्ये लाईन फिटिंगचे काम सुरू असताना ठेकेदार गजानन काकफळे आणि त्यांचे मजूर रवी धनराज यांच्यावर माश्यांनी भीषण आक्रमण केले.
कामगाराची प्रकृती गंभीर
या तिसऱ्या घटनेत मजूर रवी धनराज यांना मधमाश्यांनी शरीराच्या अनेक ठिकाणी चावा घेतल्याने त्यांची प्रकृती बिघडली. त्यांना तातडीने पिंपळगाव रेणुकाई येथे प्राथमिक उपचारासाठी दाखल करण्यात आले. मात्र, विषबाधा आणि जखमांचे गांभीर्य लक्षात घेता, डॉक्टरांनी त्यांना पुढील उपचारासाठी छत्रपती संभाजीनगर येथील रुग्णालयात रवाना केले आहे.
परिसरात भीतीचे सावट; शाळेसमोर धोका वाढला!
जिल्हा परिषद शाळेच्या मुख्य प्रवेशद्वारासमोरच ही उंच इमारत असल्याने विद्यार्थ्यांच्या सुरक्षेचा प्रश्न आता अत्यंत गंभीर झाला आहे. एकाच दिवशी पाच जणांना लक्ष केल्यामुळे परिसरात घबराटीचे वातावरण आहे. स्थानिक रहिवाशांनी दिलेल्या माहितीनुसार, या रस्त्यावरून ये-जा करणे आता जीवावर बेतणारे ठरत आहे.
प्रशासनाकडून तातडीच्या कार्यवाहीची अपेक्षा
घटनेची माहिती मिळताच ग्रामपंचायत प्रशासनाने दखल घेतली असून, मोहोळ काढण्याचे नियोजन सुरू केले आहे. मात्र, तोपर्यंत नागरिकांनी या परिसरातून जाताना अत्यंत सावधगिरी बाळगावी, असे आवाहन करण्यात येत आहे.
