पुलवामा शहिदांना पारधमध्ये श्रद्धांजली; देशसेवा करणाऱ्या आजी-माजी सैनिकांचा कृतज्ञता सोहळा!
पारधमध्ये देशभक्तीचा महाकुंभ! शहीद जवानांना ७ व्या पुण्यतिथीनिमित्त मानवंदना; आजी-माजी सैनिकांच्या सन्मानाने भारावले वातावरण
पारध (भोकरदन): देशाच्या सीमेवर डोळ्यात तेल घालून रक्षण करणाऱ्या सैनिकांप्रति कृतज्ञता व्यक्त करण्यासाठी जालना जिल्ह्यातील पारध (बु.) येथे देशभक्तीचा जागर पाहायला मिळाला. पुलवामा येथील शहीद जवानांच्या सातव्या पुण्यतिथीचे औचित्य साधून आणि पारधचे सुपुत्र वीर शहीद जवान रवींद्र सुरडकर यांच्या स्मृतीप्रत्यर्थ भव्य श्रद्धांजली व सैनिकांचा सन्मान सोहळा उत्साहात पार पडला.
सैनिकांचा गौरव आणि कृतज्ञता सोहळा:
लाल बहादूर शास्त्री सांस्कृतिक युवा क्रीडा मंडळ, स्व. हरिवंश राय बच्चन बहुउद्देशीय संस्था आणि स्व. राजेंद्रजी श्रीवास्तव इंग्लिश स्कूल व महाविद्यालयाच्या वतीने या प्रेरणादायी कार्यक्रमाचे आयोजन करण्यात आले होते. यावेळी परिसरातील आजी व माजी सैनिकांचा शाल व श्रीफळ देऊन गौरव करण्यात आला. देशसेवेसाठी आयुष्य वेचलेल्या या वीरांचा सन्मान होताना उपस्थितांचे डोळे पाणावले होते.
मान्यवरांचा सत्कार व श्रद्धांजली:
कार्यक्रमात माजी सैनिक समाधान राऊत, महेंद्र देशमुख, सुभाष लोखंडे, रतन काकरवाल, रामभाऊ मोकाशे व श्री. सुरडकर यांचा विशेष सन्मान करण्यात आला. तसेच, शिक्षण क्षेत्रातील प्रदीर्घ सेवेबद्दल सेवानिवृत्त शिक्षक रवी सर आणि सामाजिक कार्याबद्दल कैलास वाघ यांचाही गौरव करण्यात आला. यावेळी माजी सैनिक स्व. श्रीपत जाधव व स्व. अशोक सुरडकर यांना भावपूर्ण श्रद्धांजली अर्पण करण्यात आली.
प्रशासकीय व सामाजिक उपस्थिती:
हा भव्य सोहळा माजी जिल्हा परिषद सभापती मनीष श्रीवास्तव, उपसरपंच शेखर श्रीवास्तव आणि संस्थेचे सचिव विक्रांत श्रीवास्तव यांच्या मार्गदर्शनाखाली संपन्न झाला. यावेळी शाळेचे मुख्याध्यापक, शिक्षक, विद्यार्थी आणि ग्रामस्थ मोठ्या संख्येने उपस्थित होते.
देशभक्तीपर गीतांनी भारावला परिसर:
कार्यक्रमाच्या उत्तरार्धात संभाजीनगर येथील आर्केस्ट्रा टीमने सादर केलेल्या देशभक्तीपर गीतांनी संपूर्ण परिसर राष्ट्रप्रेमाने न्हाऊन निघाला. शिस्त, देशनिष्ठा आणि बलिदानाची जाणीव करून देणारा हा सोहळा पारधच्या इतिहासात मैलाचा दगड ठरला आहे.
