पारधच्या उपोषणाचा आज दुसरा दिवस! स्मशानभूमीसोबतच ‘रस्त्याची हद्द’ कायम करण्याचे तहसीलदारांचे आदेश; प्रशासकीय यंत्रणा ॲक्शन मोडमध्ये!
By तेजराव दांडगे
पारधच्या उपोषणाचा आज दुसरा दिवस! स्मशानभूमीसोबतच ‘रस्त्याची हद्द’ कायम करण्याचे तहसीलदारांचे आदेश; प्रशासकीय यंत्रणा ॲक्शन मोडमध्ये!
पारध, दि. ०५ (जालना): जालना जिल्ह्यातील भोकरदन तालुक्यातील पारध बु. येथील विविध प्रलंबित विकासकामांच्या मागण्यांसाठी सुरू असलेल्या आमरण उपोषणाचा आज दुसरा दिवस आहे. आंदोलनाच्या वाढत्या दबावामुळे प्रशासकीय यंत्रणा पूर्णपणे ॲक्शन मोडमध्ये आली असून, महसूल विभागापाठोपाठ आता महावितरणनेही प्रत्यक्ष कामाची तयारी सुरू केली आहे.
महावितरणकडून साहित्यासह उपोषणस्थळी भेट:
आज महावितरणचे उपविभागीय अधिकारी श्री. चेचकर यांनी उपोषणस्थळी भेट दिली. विशेष म्हणजे, केवळ आश्वासन न देता त्यांनी वीज खांब (पोल) आणि मेंटेनन्सचे इतर साहित्य सोबत आणून प्रशासकीय तत्परता दाखवून दिली. शिवसेना उपजिल्हाप्रमुख मनीष श्रीवास्तव यांनी माहिती दिली की, उद्या देखील उर्वरित साहित्य उपोषणस्थळी दाखल होणार असून कामाला गती दिली जाईल.
पोलीस आणि महसूल प्रशासनाचा समन्वय:
या कार्यवाहीसाठी तहसीलदारांनी सहाय्यक पोलीस निरीक्षक (API), पारध यांनी दि. ४ फेब्रुवारी २०२६ रोजी दिलेल्या पत्राचा संदर्भ घेतला आहे. पोलीस प्रशासनाच्या सक्रियतेमुळे आणि उपविभागीय अधिकाऱ्यांच्या भेटीमुळे या प्रकरणाला गती मिळाली असून, आता महसूल, पोलीस आणि महावितरणच्या समन्वयाने पुढील प्रक्रिया पार पडणार आहे.
तहसीलदारांच्या पत्रातील प्रमुख निर्णय:
PWD रस्त्याची हद्द निश्चिती: मौजे पारध बु. ते धामणगाव रस्ता (रा.मा. २१४) याची हद्द कायम करून देण्याची मागणी मान्य करण्यात आली असून उपविभागीय अभियंता (PWD) यांना तातडीने कार्यवाहीचे आदेश दिले आहेत.
स्मशानभूमीची शासकीय नोंद: पारध बु. येथील गट नंबर ३८९ मधील वहीवाटीप्रमाणे असलेल्या २० आर क्षेत्रावर ‘हिंदू स्मशानभूमी’ म्हणून नोंद करण्यासाठी मंडल अधिकारी आणि ग्राम महसूल अधिकारी यांना तात्काळ चौकशी अहवाल सादर करण्याचे निर्देश दिले आहेत.
आंदोलन मागे घेण्याचे आवाहन:
प्रशासनाने सर्व मागण्यांवर सकारात्मक कार्यवाही सुरू केल्याचे लेखी आश्वासन आणि प्रत्यक्ष साहित्याची उपलब्धता केल्यानंतर, तहसीलदार भोकरदन यांनी उपोषणकर्ते उपसरपंच शेखर श्रीवास्तव आणि सरपंच पती बाबुराव काकफळे यांना आपले आमरण उपोषण मागे घेण्याची विनंती केली आहे.
