जालन्यात माणुसकीला काळीमा! ८० वर्षीय आईला मुलांकडूनच बेघर, जमिनीच्या वादातून हृदयद्रावक घटना
By तेजराव दांडगे
जालन्यात माणुसकीला काळीमा! ८० वर्षीय आईला मुलांकडूनच बेघर, जमिनीच्या वादातून हृदयद्रावक घटना
जालना, ६ जून (प्रतिनिधी): ‘आई’ म्हणजे घरातली लक्ष्मी, घराला घरपण देणारी. पण, जालना जिल्ह्यातील भोकरदन तालुक्यातील हिसोडा बुद्रुक गावात एका ८० वर्षीय वृद्ध मातेला तिच्याच मुलांनी आणि नातवाने घराबाहेर काढल्याचा आणि जमिनीच्या मोबदल्यापासून वंचित ठेवल्याचा धक्कादायक प्रकार समोर आला आहे. या हृदयद्रावक प्रकारानंतर पीडित कमलाबाई बाळा बावस्कर यांनी थेट पोलिसांत धाव घेतली असून, त्यांच्या फिर्यादीवरून मुलांविरुद्ध गुन्हा दाखल करण्यात आला आहे.
नेमकं काय घडलं?
हिसोडा बुद्रुक येथील कमलाबाई बाळा बावस्कर (वय ८०, व्यवसाय-शेती) यांनी दिलेल्या तक्रारीनुसार, त्यांचे मुलगे पंडित बाळा बावस्कर (वय ६०), भास्कर बाळा बावस्कर (वय ५७), अशोक बाळा बावस्कर (वय ५३), दशरथ बाळा बावस्कर, आणि नातू श्रीराम भास्कर बावस्कर यांनी संगनमत करून त्यांच्या पतीची शेतजमीन आपसात वाटून घेतली. इतकंच नाही, तर कमलाबाईंच्या नावावर असलेली ३१ गुंठे जमीनही हे आरोपीत परस्पर पेरणी करत आहेत, मात्र तिला कोणताही मोबदला देत नाहीत.
कमलाबाईंनी आपल्या तक्रारीत आरोप केला आहे की, आरोपीतांपैकी एका नातवाने त्यांना धक्काबुक्की केली आणि जिवे मारण्याची धमकी दिली. आपला सांभाळ करणे हे मुलांचे कर्तव्य असतानाही, त्यांनी कमलाबाईंची शेती हिसकावून त्यांना घरातून बाहेर काढले. ही संतापजनक घटना ६ जून २०२५ रोजी सायंकाळी ७.०० वाजता हिसोडा बुद्रुक येथे घडली.
गुन्हा दाखल, तपास सुरू
या प्रकरणी जेष्ठ नागरिक आणि पालक यांचे पालनपोषण आणि कल्याण अधिनियम २००७ अन्वये गुन्हा दाखल करण्यात आला आहे. सहायक पोलीस निरीक्षक यांच्या आदेशाने पो.हे.कॉ. एस. सी. खिल्लारे यांनी गुन्हा दाखल केला असून, पुढील तपास स.पो.नि. संतोष माने हे स्वतः करत आहेत.
या घटनेमुळे समाजात ‘माय-लेकरांच्या’ नात्याची वीण ढिली होत चालली आहे का, असा प्रश्न निर्माण झाला आहे. वृद्ध नागरिकांच्या हक्कांचे संरक्षण आणि कौटुंबिक मूल्यांचा ऱ्हास या गंभीर प्रश्नांवर पुन्हा एकदा प्रकाशझोत पडला आहे. पोलिसांच्या पुढील तपासातून या प्रकरणातील सत्य समोर येईल आणि वृद्ध आईला न्याय मिळेल अशी आशा आहे.
