पोलीस हवालदार प्रकाश सिनकर यांचे वालसावंगी जिल्हा परिषद प्राथमिक शाळेत मार्गदर्शन; विद्यार्थी झाले जागरूक

पोलीस हवालदार प्रकाश सिनकर यांचे वालसावंगी जिल्हा परिषद प्राथमिक शाळेत मार्गदर्शन; विद्यार्थी झाले जागरूक

पारध, दि. 15: पोलीस स्टेशन पारध येथील कर्तव्यदक्ष पोलीस हवालदार प्रकाश सिनकर यांनी आज दिनांक १५ एप्रिल, २०२५ रोजी वालसावंगी जिल्हा परिषद प्राथमिक शाळेतील सुमारे ४०० विद्यार्थ्यांशी संवाद साधला. या विशेष कार्यक्रमात त्यांनी विद्यार्थ्यांना पोस्को कायदा, बाल मानसशास्त्र, सायबर क्राईम, चांगला स्पर्श आणि वाईट स्पर्श यांसारख्या महत्त्वाच्या विषयांवर मार्गदर्शन केले.

यावेळी सिनकर यांनी अंधश्रद्धा निर्मूलन कायदा, जादूटोणा प्रतिबंधक कायदा, भारतीय न्याय संहिता आणि भारतीय नागरिक सुरक्षा संहिता कायद्यातील महत्त्वपूर्ण तरतुदींची माहिती विद्यार्थ्यांना दिली. विशेषतः शालेय विद्यार्थिनींना स्वतःचे संरक्षण कसे करावे, याबाबत त्यांनी सखोल मार्गदर्शन केले. अनोळखी व्यक्ती कशा प्रकारे फायदा घेतात आणि त्याचे गंभीर परिणाम भोगावे लागतात, याबद्दल त्यांनी जागरूकता निर्माण केली. त्यामुळे विद्यार्थ्यांनी सक्षम आणि निर्भय राहण्याचे महत्त्व पटवून दिले.

सुरक्षेच्या दृष्टीने शाळेत सीसीटीव्ही कॅमेरे बसवणे आणि तक्रार पेटीची व्यवस्था करणे आवश्यक आहे, अशा सूचनाही सिनकर यांनी यावेळी दिल्या.

पोलीस अधीक्षक, जालना यांनी प्रकाशित केलेल्या ‘मुलींचे संरक्षणाबाबत आधुनिक जगात एक पाऊल पुढे’ या सुरक्षा मंत्र पुस्तकातील महत्त्वाच्या बाबी विद्यार्थ्यांना समजावून सांगण्यात आल्या. तसेच, विद्यार्थ्यांना हे सुरक्षा मंत्र पुस्तक मोफत वितरित करण्यात आले. जालना पोलिसांच्या व्हाट्सअप चॅनलला जास्तीत जास्त फॉलो करण्याचे आणि सुरक्षा मंत्र पुस्तिकेची डिजिटल कॉपी मिळवण्यासाठी क्यूआर कोड स्कॅन करण्याचे आवाहनही त्यांनी केले. पुस्तकात नमूद केलेल्या पोस्को कायदा, चांगला स्पर्श-वाईट स्पर्श, सायबर गुन्हे, छळ, वाहतूक नियम आणि परीक्षा ताण व्यवस्थापन यांसारख्या विषयांवरील अधिक माहितीसाठी क्यूआर कोड स्कॅन करण्याचे मार्गदर्शनही त्यांनी विद्यार्थ्यांना केले.

पोलीस हवालदार प्रकाश सिनकर यांच्या या माहितीपूर्ण आणि महत्त्वपूर्ण मार्गदर्शन कार्यक्रमामुळे वालसावंगी जिल्हा परिषद प्रशालेतील विद्यार्थी निश्चितच अधिक जागरूक आणि सुरक्षित राहण्यास मदत होईल, अशी प्रतिक्रिया मुख्याध्यापकांनी व्यक्त केली.