जालन्यात पोलिसांची मुजोरी! प्रजासत्ताक दिनी कव्हरेज करणाऱ्या पत्रकारांना धक्काबुक्की; माध्यम वर्तुळात तीव्र संताप
By गौतम वाघ
जालन्यात पोलिसांची मुजोरी! प्रजासत्ताक दिनी कव्हरेज करणाऱ्या पत्रकारांना धक्काबुक्की; माध्यम वर्तुळात तीव्र संताप
जालना (D9 News प्रतिनिधी): जालना जिल्हा पोलीस मुख्यालयातील मैदानावर प्रजासत्ताक दिनाचे कव्हरेज करणाऱ्या पत्रकारांना पोलिसांनी धक्काबुक्की केल्याची धक्कादायक घटना समोर आली आहे. पालकमंत्री पंकजा मुंडे यांच्या उपस्थितीत हा सोहळा सुरू असताना हा प्रकार घडल्याने जिल्हाभरातील पत्रकार संघटनांनी या घटनेचा जाहीर निषेध केला आहे.
नेमकी घटना काय?
प्रजासत्ताक दिनानिमित्त पोलीस मुख्यालयावर ध्वजारोहण आणि संचलन सुरू होते. यावेळी पालकमंत्री पंकजा मुंडे परेडचे निरीक्षण करत असताना, इलेक्ट्रॉनिक मीडियाचे प्रतिनिधी त्याचे फुटेज आणि कव्हरेज करण्यासाठी पुढे गेले होते. यावेळी कर्तव्यावर असलेल्या काही पोलीस कर्मचाऱ्यांनी संयम सोडून पत्रकारांना धक्काबुक्की करत मैदाबाहेर काढण्याचा प्रयत्न केला.
पत्रकारांचा सन्मान कुठे?
एकीकडे लोकशाहीचा चौथा स्तंभ मानला जाणाऱ्या पत्रकारांना सन्मानाची वागणूक देण्याचे बोलले जाते, तर दुसरीकडे प्रत्यक्ष प्रजासत्ताक दिनीच पोलिसांकडून अशा प्रकारे अपमानास्पद वागणूक दिली गेल्याने संताप व्यक्त होत आहे. धक्काबुक्की करणाऱ्या पोलिसांवर कठोर कारवाई करण्याची मागणी आता जोर धरू लागली आहे.
पोलिसांच्या कार्यक्षमतेवर प्रश्नचिन्ह
जिल्ह्यात गेल्या काही दिवसांत गुन्हेगारीचे प्रमाण वाढले असून, दिवसाढवळ्या खून, अवैध वाळू उपसा आणि ड्रग्ज विक्रीसारखे प्रकार घडत आहेत. “अवैध धंदे रोखण्यात अपयशी ठरणारे पोलीस, आपले कर्तव्य बजावणाऱ्या पत्रकारांवर मात्र मुजोरी गाजवत आहेत,” अशा शब्दांत उपस्थित पत्रकारांनी आपला रोष व्यक्त केला.
प्रशासनाला आव्हान
पत्रकार संरक्षण कायदा असतानाही पोलीस प्रशासनाकडून अशा प्रकारे अन्याय होत असेल, तर याला वाचा फोडावीच लागेल, असा इशारा पत्रकार संघटनांनी दिला आहे. या प्रकरणी पालकमंत्री पंकजा मुंडे यांनी लक्ष घालून दोषी पोलीस कर्मचाऱ्यांवर कारवाई करावी, अशी मागणी करण्यात आली आहे.
