परतूर पोलिसांची मोठी कारवाई, मोटारसायकल चोरणाऱ्या टोळीला अटक; ९ लाख ४० हजारांच्या १३ गाड्या जप्त

परतूर पोलिसांची मोठी कारवाई, मोटारसायकल चोरणाऱ्या टोळीला अटक; ९ लाख ४० हजारांच्या १३ गाड्या जप्त

परतूर, दि. ०२: शहरात आणि जिल्ह्यात मोटारसायकल चोरीच्या वाढत्या घटनांना आळा घालण्यासाठी परतूर पोलिसांनी मोठी कारवाई केली आहे. पोलिसांनी मोटारसायकल चोरणाऱ्या तीन आरोपीतांना अटक करून त्यांच्याकडून तब्बल ९ लाख ४० हजार रुपये किमतीच्या १३ महागड्या मोटारसायकली जप्त केल्या आहेत.

पोलीस अधीक्षक अजयकुमार बंसल यांच्या आदेशानुसार पोलीस निरीक्षक एस.बी. भागवत यांनी मोटारसायकल चोरीचे गुन्हे उघडकीस आणण्यासाठी एक विशेष तपास पथक नेमले होते. हे पथक शहरातील व तालुक्यातील चोरीस गेलेल्या मोटारसायकलींचे तांत्रिक विश्लेषण करत होते.

अशी झाली अटक:
१ ऑगस्ट २०२५ रोजी पोलीस निरीक्षक श्री. भागवत यांना गुप्त माहिती मिळाली की, एका गुन्ह्यात चोरीस गेलेली मोटारसायकल परतूर-वाटूर रोडवरील बालाजीनगर येथील ‘हॉटेल मोक्ष’समोरून चोरण्यात आली आहे. या माहितीच्या आधारे पोलिसांनी तात्काळ कारवाई करत लिंगसा (ता. परतूर) येथून विष्णू दादाराव माने (वय २०) याला ताब्यात घेतले. चौकशीदरम्यान त्याने आपले साथीदार वैभव ज्ञानेश्वर धरपडे (वय २१, रा. सादोळा) आणि सुभाष उर्फ राजेश प्रभाकर जाधव (वय २५, रा. लिंगसा) यांच्यासोबत मिळून अनेक मोटारसायकली चोरल्याची कबुली दिली.

जप्त केलेल्या मोटारसायकली:
पोलिसांनी या आरोपीतांकडून विविध कंपन्यांच्या एकूण १३ मोटारसायकली जप्त केल्या आहेत, ज्यांची अंदाजे किंमत ९,४०,००० रुपये आहे. यामध्ये ७ Honda Shine, ३ Hero HF Deluxe, १ Passion Pro आणि १ Splendor+ मोटारसायकलचा समावेश आहे.

आरोपीतांनी जालना, बीड, छत्रपती संभाजीनगर या जिल्ह्यांतून या गाड्या चोरल्याचे सांगितले आहे. त्यामुळे आणखी काही गुन्हे उघडकीस येण्याची शक्यता पोलिसांनी वर्तवली आहे.

पोलीस अधीक्षक अजयकुमार बंसल, अपर पोलीस अधीक्षक आयुष नोपाणी, उपविभागीय पोलीस अधिकारी विशाल खांबे यांच्या मार्गदर्शनाखाली पोलीस निरीक्षक एस.बी. भागवत, पोउपनि अमोल रावते, धर्मा शिंदे, किरण मोरे, गजानन राठोड, विजय जाधव, भागवत खाडे, नरेंद्र चव्हाण, दशरथ गोपनवाड, सॅम्युअल गायकवाड, पवनकुमार धापसे आणि आय.टी. सेलचे सागर बाविस्कर यांनी ही यशस्वी कारवाई केली.