‘वर्ग तोच, आठवणी ताज्या!’ जनता विद्यालय, पारध येथील २०१० च्या बॅचचा १५ वर्षांनंतर अभूतपूर्व स्नेहमेळावा संपन्न

‘वर्ग तोच, आठवणी ताज्या!’ जनता विद्यालय, पारध येथील २०१० च्या बॅचचा १५ वर्षांनंतर अभूतपूर्व स्नेहमेळावा संपन्न

पारध: आयुष्यातील १५ वर्षांचा काळ लोटला असला तरी, शाळेच्या भिंती आणि शिक्षकांचे मार्गदर्शन कधीच विसरले जात नाही. याच प्रेमापोटी, जालना जिल्ह्यातील भोकरदन तालुक्यातील पारध बू येथील केळणा-अजिंठा शिक्षण संस्थेच्या जनता विद्यालय व महाविद्यालयाच्या २०१० बॅचचे विद्यार्थी-विद्यार्थिनी तब्बल १५ वर्षांनंतर आपल्या दहावीच्या वर्गात एकत्र आले आणि त्यांचा स्नेहमेळावा (गेट-टूगेदर) नुकताच मोठ्या उत्साहात पार पडला.

शाळेतच स्नेहबंध दृढ:
रिसॉर्ट किंवा इतर ठिकाणी हा सोहळा न करता, आपल्या जुन्या वर्गातच हा स्नेहमेळावा आयोजित करण्याचा निर्णय विद्यार्थ्यांनी घेतला. वर्ग तोच, बेंच तेच, आणि शिकवणारे आजी-माजी शिक्षकही तेच असल्याने, वातावरणात एक भावनिक ओलावा जाणवत होता. कार्यक्रमाच्या ठिकाणी सुंदर सजावट करण्यात आली होती.

कार्यक्रमाची सुरुवात आणि गुरुजनांचा सन्मान:
स्नेहमेळाव्याची सुरुवात अखंड हिंदुस्थानचे आराध्य दैवत छत्रपती शिवाजी महाराज यांच्या प्रतिमेचे पूजन करून करण्यात आली. सर्व गुरुवर्यांना फुलांच्या वर्षावात कार्यक्रमाच्या ठिकाणी आणले गेले आणि त्यांचे औक्षण करण्यात आले. पारंपरिक पद्धतीने राष्ट्रगीत, प्रार्थना गायन करून कार्यक्रमाची सुरुवात झाली.

कार्यक्रमाचे स्वागत संयोजक आणि मुख्याध्यापक सौ. शर्मिला शिंदे यांनी केले. या स्नेहमेळाव्यात उपस्थित सर्व गुरुजनांचा शाल, श्रीफळ, पुष्पगुच्छ आणि सन्मानपत्र देऊन यथोचित गौरव करण्यात आला.

आठवणींना उजाळा देणारे मनोगत:
यावेळी अनेक माजी विद्यार्थ्यांनी आपल्या शालेय जीवनातील आठवणी, अनुभव आणि शिक्षकांचे महत्त्व व्यक्त केले. मनोगत व्यक्त करणाऱ्यांमध्ये अक्षय लोखंडे, सागर देशमुख, सुमय्या पठाण, राजकन्या लोखंडे, मंगेश देशमुख, विकास लोखंडे, राहुल पायघन, विकास पायघन, आणि मंगेश आंबेकर यांचा समावेश होता.

१) अनिल हिंगे यांनी आपल्या सुमधुर आवाजात हिंदी चित्रपट गीत सादर केले.
२) मंगेश आंबेकर यांनी आपल्या सुरेख वाणीतून कविता सादर करून दाद मिळवली.
३) स्वाती लोखंडे यांनी शाळेच्या गेटसमोरून जाता-येतानाच्या काही खास आठवणी सांगितल्या.

गुरुजनांचा अमूल्य संदेश:
शिक्षकांच्या वतीने प्राध्यापक हिवाळे सर, प्राध्यापक देशमुख सर, मुख्याध्यापक शिंदे मॅडम, पर्यवेक्षक महिंद्र लोखंडे सर, प्राध्यापक संग्राम देशमुख सर, आणि शिक्षक बकिमचंद्र लोखंडे सर यांनी मनोगते व्यक्त केली.

प्रा. हिवाळे यांनी आपल्या मनोगतात व्यक्त केलेला विचार खूप मोलाचा होता. ते म्हणाले, “गेट-टुगेदर रिसॉर्टवर करण्यापेक्षा आपल्या शाळेत आणि माणसात करणे खूप अनमोल असते. शिक्षक आणि आई-वडील यांचा आशीर्वाद पाठीशी असेल, तर आयुष्यात काहीच कमी पडणार नाही.”

कार्यक्रमाचा समारोप:
या अभूतपूर्व स्नेहमेळाव्याचे सूत्रसंचालन विकास लोखंडे यांनी केले, तर सागर देशमुख यांनी उपस्थित सर्व शिक्षक आणि माजी विद्यार्थी-विद्यार्थिनींचे आभार मानले.

कार्यक्रमाच्या यशस्वीतेसाठी राजकन्या लोखंडे, पूजा लोखंडे, शितल देशमुख, रेणुका तबडे, योगिता पाखरे, सीमा क्षीरसागर यांच्यासह अनेक माजी विद्यार्थी-विद्यार्थिनींनी विशेष परिश्रम घेतले. या स्नेहमेळाव्याने सर्व जुन्या मित्रांचे स्नेहबंध अधिक दृढ केले आणि त्यांना पुन्हा एकदा शालेय जीवनाच्या गोड आठवणीत रममाण होण्याची संधी मिळाली.