जालना उप प्रादेशिक परिवहन कार्यालयाला राज्यात द्वितीय क्रमांक!

जालना उप प्रादेशिक परिवहन कार्यालयाला राज्यात द्वितीय क्रमांक!

महाराष्ट्र शासनाच्या महत्त्वाकांक्षी ‘१०० दिवसीय कार्यालयीन सुधारणा विशेष मोहीम’ अंतर्गत जालना येथील उप प्रादेशिक परिवहन कार्यालयाने (RTO) राज्यात द्वितीय क्रमांक पटकावला आहे. मुख्यमंत्री देवेंद्र फडणवीस यांच्या दूरदृष्टीतून राबवलेल्या या मोहिमेचा उद्देश शासनाच्या विविध योजनांची माहिती नागरिकांपर्यंत पोहोचवून लाभ उपलब्ध करून देणे आणि प्रशासन व नागरिकांमधील विश्वास वाढवणे हा होता.

उत्कृष्ट कामगिरीचे कारण
प्रशासकीय कामकाजात गतिशीलता, पारदर्शकता आणि लोकाभिमुख सेवांचे वितरण आणण्यासाठी ‘१०० दिवस कार्यालयीन सुधारणा कार्यक्रम’ राबविण्यात आला होता. यामध्ये कार्यालयीन कामकाजात नवकल्पना व तंत्रज्ञानाचा प्रभावी वापर, विहित वेळेत सेवा वितरण, ई-ऑफिसची अंमलबजावणी, डिजिटलायझेशन व कागद विरहित कार्यालयीन कामकाज, नागरिकांच्या तक्रारींचे जलद निराकरण, कार्यसंस्कृती सुधारणा अंतर्गत प्रशिक्षण अशा विविध बाबींच्या आधारावर मूल्यमापन करण्यात आले. या सर्वच बाबींमध्ये जालना उप प्रादेशिक परिवहन कार्यालयाने उत्कृष्ट कामगिरी केली.

अधिकारी-कर्मचाऱ्यांचे विशेष प्रयत्न
उप प्रादेशिक परिवहन अधिकारी चंद्रमोहन चिंतल यांनी सांगितले की, या उपक्रमासाठी कार्यालयातील सर्व अधिकारी-कर्मचारी यांनी मर्यादित वेळेत विशेष काम करून हे यश संपादन केले आहे. त्यांच्या सामूहिक प्रयत्नांमुळेच जालना RTO ने राज्यामध्ये आपले स्थान निर्माण केले.