जालना पोलिसांचा ‘गेम चेंजर’ उपक्रम: गुन्हेगारांची आता ‘अदलाबदली’

जालना पोलिसांचा ‘गेम चेंजर’ उपक्रम: गुन्हेगारांची आता ‘अदलाबदली’

जालना, दि. ०७ जुलै, २०२५ (सोमवार): गुन्हेगारीला आळा घालण्यासाठी जालना पोलिसांनी आता एक अत्यंत महत्त्वाकांक्षी आणि नावीन्यपूर्ण पाऊल उचलले आहे. पोलीस अधीक्षक श्री. अजय कुमार बंसल (भापोसे) यांच्या संकल्पनेतून ‘आरोपी आदान-प्रदान’ ही अभिनव मोहीम शनिवार, दिनांक ०५ जुलै, २०२५ पासून जालना जिल्ह्यात सुरू झाली आहे. या मोहिमेमुळे आता गुन्हेगारांना जिल्ह्याच्या कोणत्याही कोपऱ्यात लपणे मुश्किल होणार आहे!

या उपक्रमांतर्गत, शरीराविरुद्धचे गंभीर गुन्हे, अवैध शस्त्र बाळगणे, अंमली पदार्थांची तस्करी, चोरी, घरफोडी, जबरी चोरी, महिलांवरील अत्याचार आणि सायबर गुन्हे यांसारख्या विविध प्रकरणांतील आरोपींची कसून तपासणी आणि माहितीची देवाणघेवाण केली जाणार आहे.

नेमकं काय आहे हे ‘आरोपीत आदान-प्रदान’ अभियान?
या मोहिमेचा मुख्य उद्देश हा आहे की, जे गुन्हेगार सातत्याने गंभीर स्वरूपाचे गुन्हे करतात, अवैध शस्त्रे बाळगतात, अंमली पदार्थांची विक्री करतात, चेन स्नॅचिंग, मोबाईल चोरी, बॅग लिफ्टिंग, विनयभंग, बलात्कार, पोक्सो तसेच सर्व प्रकारच्या चोरी, घरफोडी, जबरी चोरी, दरोडा यांसारख्या गुन्ह्यांमध्ये जे अटक झाले आहेत, पोलिस कोठडीत आहेत किंवा कारागृहातून नुकतेच सुटले आहेत, अशा सर्व आरोपींचा संपूर्ण पूर्वेतिहास तपासला जाईल. त्यांच्या गुन्हा करण्याच्या पद्धतीची (M.O.B.) माहिती संकलित केली जाईल.

या संकलित माहितीचे सादरीकरण आठवड्यातील प्रत्येक शनिवारी पोलीस ठाणे प्रमुखांच्या व्हिडीओ कॉन्फरन्स दरम्यान जिल्ह्यातील सर्व पोलीस ठाणे प्रमुखांना केले जाईल. दर शनिवारी सर्व प्रभारी अधिकारींकडून आरोपीतांच्या सध्याच्या स्थितीबद्दल माहिती घेतली जाईल.

या मोहिमेचे प्रमुख मुद्दे असे आहेत:
१) अटक आरोपीतांची माहितीची देवाणघेवाण: आठवड्याभरात अटक झालेल्या आणि पोलीस कोठडीत असलेल्या आरोपीतांना इतर पोलीस ठाण्यांच्या प्रमुखांना दाखवले जाईल. जर एखाद्या आरोपीतांची गुन्हा करण्याची पद्धत (M.O.B.) किंवा त्याचे कार्यक्षेत्र इतर पोलीस ठाण्याच्या हद्दीतील गुन्ह्यांशी जुळत असेल, तर त्या आरोपीला संबंधित गुन्ह्यांसाठी हस्तांतरित केले जाईल.
२) कारागृहातून सुटलेल्या आरोपीतांवर लक्ष: कारागृहातून मुक्त झालेल्या आरोपीतांचा पूर्वेतिहास तपासला जाईल. जर तो इतर कोणत्याही पोलीस ठाण्यात हवा असेल, तर त्याला तातडीने अटक करून जिल्ह्यातील इतर अनुत्तरित गुन्हे उघडकीस आणण्याचा प्रयत्न केला जाईल.
३) ट्रान्सफर वॉरंटचा प्रभावी वापर: कारागृहात असलेल्या आरोपीतांचा ट्रान्सफर वॉरंट घेऊन त्यांच्याकडून इतर गुन्ह्यांची माहिती काढून तपास केला जाईल.
४) फरार आरोपीतांची चौकशी: ज्या आरोपीतांना अजूनही ताब्यात घेणे बाकी आहे, त्यांची माहिती घेऊन त्यांना हव्या असलेल्या गुन्ह्यांमध्ये त्यांची चौकशी करून गुन्हे उघडकीस आणले जातील.
५) सक्रिय गुन्हेगारांवर बारकाईने लक्ष: सक्रिय गुन्हेगारांचे रेकॉर्ड अद्ययावत केले जाईल आणि त्यांच्या प्रत्येक हालचालीवर बारकाईने लक्ष ठेवले जाईल, जेणेकरून त्यांना गुन्हे करण्यापासून रोखता येईल. जर त्यांनी गुन्हा केलाच, तर त्यांना तात्काळ अटक करून त्यांच्यावर कायदेशीर आणि प्रभावी प्रतिबंधात्मक कारवाई केली जाईल.
६) जेलमधून सुटलेल्या आणि विशिष्ट गुन्हेगारांची माहिती: आदान-प्रदान प्रक्रियेसाठी रेकॉर्डवरील जेलमधून सुटलेले, मोबाईल चोरी करणारे आणि सोनसाखळी चोरी करणाऱ्या आरोपींची विशेष माहिती घेण्यात येणार आहे.

शनिवार, ०५ जुलै, २०२५ रोजीच्या पहिल्या ‘आदान-प्रदान’ सत्रादरम्यान, जिल्ह्यातून अटक करण्यात आलेल्या ३ जबरी चोरी, ३ घरफोडी, ३ चोरी आणि १ गंभीर शारीरिक गुन्हेगार, तसेच पूर्वेतिहास असलेल्या ५ अवैध शस्त्र बाळगणारे, ४ घरफोडी, १ जबरी चोरी, ४ वाहन चोरी आणि १२ शारीरिक गुन्हे करणारे, अशा एकूण ३६ आरोपीतांविषयीची माहिती सर्व पोलीस ठाण्यांना देण्यात आली.

या नावीन्यपूर्ण ‘आरोपीत आदान-प्रदान’ उपक्रमामुळे जिल्ह्यातील सराईत आणि रेकॉर्डवरील गुन्हेगारांवर मोठा वचक बसेल. यामुळे गुन्हेगारीला आळा घालण्यास मदत होईल, गुन्हे उघडकीस आणण्याचे प्रमाण वाढेल आणि सराईत गुन्हेगारांचे रेकॉर्ड अद्ययावत होऊन त्यांच्या गुन्हेगारी प्रवृत्तीला आळा बसेल, असा विश्वास जालना पोलिसांनी व्यक्त केला आहे.