‘बेवडा’ हा शब्द योग्य आहे का? – API संतोष माने यांचे व्यसनमुक्तांना थेट ‘काळजाला भिडणारे’ मार्गदर्शन!
By तेजराव दांडगे
🚨 ‘बेवडा’ हा शब्द योग्य आहे का? – API संतोष माने यांचे व्यसनमुक्तांना थेट ‘काळजाला भिडणारे’ मार्गदर्शन!
Jalna/पारध, दि. ०४: केवळ कायद्याची भाषा नव्हे, तर माणुसकी आणि कठोर सत्य सांगत भोकरदन तालुक्यातील पारध पोलीस स्टेशनचे सहाय्यक पोलीस निरीक्षक (API) संतोष माने यांनी शेलूद येथील नवचैतन्य व्यसनमुक्ती केंद्रातील व्यसनमुक्तीसाठी आलेल्या लोकांना श्री. वाल्मिकेश्वर संस्थान (तपोवन) येथील निसर्गरम्य वातावरणात मार्गदर्शन केले. व्यसनाधीनतेमुळे व्यक्ती, कुटुंब आणि समाजात होणारे विदारक परिणाम त्यांनी आपल्या व्यक्तिगत अनुभवांतून अत्यंत थेटपणे मांडले.
👥 गुन्हेगारी वाढतेय, समाज ‘बेवडा’ म्हणतोय!
API श्री माने यांनी आपल्या बोलण्याची सुरुवात व्यसनामुळे वाढणाऱ्या सामाजिक समस्यांवर बोट ठेवत केली. “माझ्या हद्दीत ३२ गावे आहेत. अगोदर पाचोड येथे असताना ७८ गावे माझ्या हद्दीत होती,” असे सांगून त्यांनी व्यसनामुळे गुन्हेगारी मोठ्या प्रमाणात वाढू लागली असल्याचे स्पष्ट केले.
त्यांनी व्यसनमुक्तांना थेट प्रश्न विचारला, जो त्यांच्या मनाला भिडणारा होता:
> “सरळ सरळ समाजाने तुम्हाला एकच शब्द दिला – ‘बेवडा’. हा योग्य आहे का? मला सांगा. इज्जतीतला नाही हा शब्द!”
>
💔 कुटुंबाचे दुर्भाग्य: ‘तुमचा बाप बेवडा आहे!’
API संतोष माने यांनी व्यसनाचा सर्वात मोठा फटका कुटुंबाला कसा बसतो, हे अत्यंत संवेदनशीलपणे सांगितले. दारूमुळे केवळ व्यसनी व्यक्तीची नव्हे, तर त्याच्या पत्नीची आणि मुलांचीही समाजात नाचक्की होते.
ते म्हणाले, “या दारुमुळे तुमच्या पत्नीला, मुलांनाही चिडवल्या जातंय – तुमचा बाप बेवडा आहे. ही तुमच्यासाठी योग्य गोष्ट आहे का?” मुलांवर आणि कुटुंबावर होणाऱ्या मानसिक आघाताची जाणीव करून देत त्यांनी व्यसन सोडण्याची गरज अधोरेखित केली.
“आपले मुले बाळ कसे सुखी राहतील, आपल्याला समाजात कशी इज्जत मिळन यासाठी प्रयत्न करा,” असे कळकळीचे आवाहन त्यांनी केले. त्यांनी दारुमुळे गुन्हेगारी वाढत असल्याचे पुन्हा सांगत, “त्यामुळे दारू सोडण्याचा प्रयत्न करा. माऊली तुम्हाला खूप चांगलं मार्गदर्शन करत आहेत,” असे स्पष्ट केले.
🩸 वैयक्तिक अनुभवाने दिला दारूला हात न लावण्याचा संकल्प
मार्गदर्शनादरम्यान API माने यांनी दारूला कधीही हात न लावण्यामागील आपला वैयक्तिक प्रेरणास्रोत उघड केला. त्यांनी सांगितले की, त्यांनी माऊलींना (हभप ज्ञानेश्वर माऊली शेलूदकर) बसल्या-बसल्या एकच शब्द सांगितला, “मी दारूला हात न लावण्याचे कारण माझे काका होते.”
त्यांच्या काकांबद्दलचा कटू अनुभव सांगताना ते म्हणाले की, त्यांचे काका दारू पिऊन एवढा भयानक धिंगाणा करायचे की त्यांची पत्नी (म्हणजेच त्यांची काकू) खूप त्रस्त असायची. इतकेच नाही तर, “माझ्या मावशीचं दुर्भाग्य असं आहे की, तिचा मुलगा पण असंच बेवडा आहे. हा वडिलांचा परिणाम आहे,” असे सांगून त्यांनी व्यसनाचा वारसा पुढच्या पिढीत कसा उतरतो, हे स्पष्ट केले.
API संतोष माने यांनी कायद्याच्या आणि खाकी वर्दीच्या बाहेर जाऊन, एका मार्गदर्शकाच्या भूमिकेतून, व्यसनमुक्तांना कठोर सत्य आणि कुटुंबाचे महत्त्व समजावून सांगत त्यांना सन्मानाचे जीवन जगण्यासाठी प्रेरित केले.
यावेळी नवचैतन्य व्यसनमुक्ती केंद्राचे हभप ज्ञानेश्वर माऊली शेलूदकर, संस्थांनचे पिठाधीश महंत शिवाजी महाराज, पारध पोलीस स्टेशनचे API संतोष माने, पद्मावती येथील माजी सरपंच रमेश तराळ, तसेच मराठी पत्रकार संघांचे तालुका उपाध्यक्ष रवी लोखंडे, केंद्रीय पत्रकार संघांचे जिल्हाध्यक्ष विशाल आस्वार, पत्रकार तेजराव दांडगे आदी मान्यवर उपस्थित होते.
