Jalna: पारध गावात लोकशाहीर अण्णाभाऊ साठे जयंतीचा जल्लोष, पोलिस अधिकाऱ्यांचाही सहभाग

Jalna: पारध गावात लोकशाहीर अण्णाभाऊ साठे जयंतीचा जल्लोष, पोलिस अधिकाऱ्यांचाही सहभाग

पारध, दि. ०१ : जालना जिल्ह्यातील पारध बु. या गावात लोकशाहीर अण्णाभाऊ साठे यांची जयंती मोठ्या उत्साहात आणि अनोख्या पद्धतीने साजरी करण्यात आली. गावातील अण्णाभाऊ साठे सभागृहात झालेल्या या कार्यक्रमाची सुरुवात महापुरुषांना अभिवादन करून झाली.

कार्यक्रमाच्या सुरुवातीला डॉ. बाबासाहेब आंबेडकर आणि गौतम बुद्ध यांच्या प्रतिमेला पुष्पहार अर्पण करण्यात आला, त्यानंतर अण्णाभाऊ साठे यांच्या प्रतिमेची पूजा करून ध्वजारोहण करण्यात आले. या सोहळ्याला उपस्थित मान्यवरांनी समाजप्रबोधनावर मोलाचे विचार मांडले. प्रा. अनिल मगर यांनी अण्णाभाऊंच्या प्रसिद्ध ‘फकिरा’ कादंबरीवर सखोल व्याख्यान दिले, तर निवृत्त शिक्षक रामराम रिंढे यांनी त्यांच्या जीवनकार्याचा वेध घेतला. जिल्हा परिषद शिक्षक श्री. गावंडे, ग्रामविकास अधिकारी संजय पुरी, पत्रकार रवी लोखंडे आणि शाहीर सुभाष सुरडकर यांनीही आपल्या भाषणातून अण्णाभाऊंच्या कार्याचे महत्त्व सांगितले.

सायंकाळी ६ ते १० या वेळेत अण्णाभाऊंची मिरवणूक शांततेत काढण्यात आली, या मिरवणुकीदरम्यान सहायक पोलीस निरीक्षक संतोष माने यांच्या हस्ते अण्णाभाऊ साठे यांची आरती करण्यात आली, हे या कार्यक्रमाचे विशेष आकर्षण ठरले. मिरवणुकीत महात्मा ज्योतिबा फुले आणि छत्रपती शिवाजी महाराज यांनाही पुष्पहार अर्पण करून आदराने अभिवादन करण्यात आले.

कार्यक्रमाच्या यशस्वीतेसाठी उत्सव समितीच्या पदाधिकाऱ्यांनी आणि सर्व समाजबांधवांनी विशेष परिश्रम घेतले. बाबुराव काकफळे यांनी सूत्रसंचालन केले, तर सरपंच सौ. शारदाबाई काकफळे यांनी अध्यक्षस्थान भूषवले. या कार्यक्रमाला प्राध्यापक राजाराम डोईफोडे, पोलीस जमादार प्रकाश सिनकर, ग्रामपंचायत सदस्य जगन्नाथ लोखंडे, गणेश लोखंडे, सुनील डोईफोडे, साहेबअली शाह, पत्रकार रवी लोखंडे, रामसिंग ठाकूर, तेजराव दांडगे, कृष्णा लोखंडे यांच्यासह उत्सव समितीचे अध्यक्ष दीपक दांडगे, उपाध्यक्ष महादू दांडगे, गणेश दांडगे आणि इतर पदाधिकारी तसेच मोठ्या संख्येने समाजबांधव उपस्थित होते.