महाराष्ट्रात 34,000 कोटींची गुंतवणूक, 33,000 रोजगाराची निर्मिती!

महाराष्ट्रात 34,000 कोटींची गुंतवणूक, 33,000 रोजगाराची निर्मिती!

मुंबई: महाराष्ट्रात गुंतवणुकीचा ओघ सुरूच असून, आज सह्याद्री अतिथीगृह येथे मुख्यमंत्री देवेंद्र फडणवीस यांच्या उपस्थितीत १७ महत्त्वपूर्ण सामंजस्य करार (MoU) करण्यात आले. या करारांतून राज्यात सुमारे ₹34,000 कोटींची गुंतवणूक येणार असून, त्यातून जवळपास 33,000 नवीन रोजगार निर्माण होणार आहेत.

या गुंतवणुकीमध्ये इलेक्ट्रॉनिक्स, पोलाद, सौर ऊर्जा, इलेक्ट्रिक बसेस आणि ट्रक्स, तसेच संरक्षण क्षेत्रातील विविध उद्योगांचा समावेश आहे. त्यामुळे उत्तर महाराष्ट्र, पुणे, विदर्भ, आणि कोकण अशा राज्याच्या सर्व भागांमध्ये उद्योगांना चालना मिळणार आहे.

सरकारची वचनबद्धता:
यावेळी बोलताना मुख्यमंत्री देवेंद्र फडणवीस यांनी, गुंतवणूकदारांना महाराष्ट्रात सहज आणि सुरळीत अनुभव मिळावा यासाठी सरकार वचनबद्ध असल्याचे सांगितले. केवळ कागदावर करार न करता, गुंतवणुकीच्या प्रत्येक टप्प्यावर सरकार भागीदार म्हणून सोबत राहील आणि कोणतीही अडचण येऊ देणार नाही, अशी ग्वाही त्यांनी दिली.

वीजदरात कपात आणि मैत्री पोर्टल:
राज्यात नुकताच पाच वर्षांसाठी ‘मल्टी-इयर टॅरिफ’ मंजूर करण्यात आला आहे. यामुळे विजेचे दर कमी होतील, जे उद्योगांसाठी अत्यंत महत्त्वाचे आहे. पूर्वी वीजदर दरवर्षी ९% ने वाढत होते, पण आता ते कमी होणार आहेत.
सरकारने ‘मैत्री पोर्टल’च्या माध्यमातून उद्योगांसाठी जमीन आणि परवानग्या तातडीने उपलब्ध करून देण्याचे धोरण स्वीकारले आहे, ज्यामुळे गुंतवणूकदारांचा विश्वास वाढेल, असेही मुख्यमंत्र्यांनी सांगितले.

या कार्यक्रमाला मंत्री उदय सामंत, विविध कंपन्यांचे प्रतिनिधी आणि विभागांचे अधिकारी उपस्थित होते.