समृद्धी महामार्गावर डिझेल चोरी करणाऱ्या टोळीचा पर्दाफाश; स्कॉर्पिओसह आरोपीत गजाआड, ७ लाखांचा मुद्देमाल जप्त
By तेजराव दांडगे
समृद्धी महामार्गावर डिझेल चोरी करणाऱ्या टोळीचा पर्दाफाश; स्कॉर्पिओसह आरोपीत गजाआड, ७ लाखांचा मुद्देमाल जप्त
जालना (प्रतिनिधी): समृद्धी महामार्गावर उभ्या असलेल्या ट्रकमधून डिझेल चोरी करणाऱ्या टोळीचा जालना स्थानिक गुन्हे शाखेने छडा लावला आहे. एका आरोपीला ७ लाख रुपये किमतीच्या स्कॉर्पिओ वाहनासह ताब्यात घेण्यात आले असून, या कारवाईमुळे डिझेल चोरीचे तीन गंभीर गुन्हे उघडकीस आले आहेत.
नेमकी घटना काय?
छत्तीसगड येथील ट्रक चालक धर्मेंद्र कुमार चंद्राकार हे २४ मार्च २०२६ रोजी आपल्या ट्रकमध्ये स्पंज भरून जालना येथे येत होते. पहाटे ५ वाजेच्या सुमारास गुंडेवाडीजवळील एचपी पेट्रोल पंपाजवळ ते विश्रांतीसाठी थांबले असताना, चोरट्यांनी त्यांच्या ट्रकमधून २०० लिटर डिझेल लंपास केले. चालक जागे झाल्याचे पाहून आरोपीत स्कॉर्पिओ (क्रमांक MH 45 AL 9797) मधून पळून गेले होते. याप्रकरणी चंदनझिरा पोलीस ठाण्यात गुन्हा दाखल करण्यात आला होता.
स्थानिक गुन्हे शाखेचा सापळा
पोलीस अधीक्षक अजय कुमार बंसल यांनी हा गुन्हा उघडकीस आणण्याचे आदेश स्थानिक गुन्हे शाखेचे पोलीस निरीक्षक श्री. पंकज जाधव यांना दिले होते. तपास पथकाला माहिती मिळाली की, हा गुन्हा संतोष अंबादास वाघमारे (रा. हरफळा, ता. जाफ्राबाद) याने आपल्या साथीदारांसह केला आहे. तांत्रिक माहितीच्या आधारे पथकाने देऊळगाव उगले (ता. जाफ्राबाद) येथे सापळा रचून संतोष वाघमारे याला ताब्यात घेतले.
३ गुन्ह्यांची दिली कबुली
पोलिसी खाक्या दाखवताच आरोपीताने डिझेल चोरीच्या गुन्ह्याची कबुली दिली. त्याच्याकडून ७ लाख रुपये किमतीची स्कॉर्पिओ गाडी जप्त करण्यात आली आहे. अधिक तपासात त्याने चंदनझिरा आणि जालना तालुका पोलीस ठाण्यांतर्गत केलेले आणखी दोन चोरीचे गुन्हे कबूल केले आहेत. पुढील कारवाईसाठी आरोपीताला चंदनझिरा पोलिसांच्या स्वाधीन करण्यात आले आहे.
या पथकाने केली कारवाई
ही यशस्वी कारवाई पोलीस अधीक्षक अजयकुमार बंसल, अपर पोलीस अधीक्षक आयुष नोपाणी, उपविभागीय पोलीस अधिकारी अनंत कुलकर्णी यांच्या मार्गदर्शनाखाली पोलीस निरीक्षक पंकज जाधव, सपोनि सचिन खाममळ, पोउपनि राजेंद्र वाघ, रामप्रसाद पव्हरे, प्रभाकर वाघ, रमेश राठोड, ईरशाद पटेल, संदीप चिंचोले, सुधीर वाघमारे, सतिष श्रीवास, रमेश काळे, धीरज भोसले (सर्व स्थानिक गुन्हे शाखा) तसेच जाफ्राबाद पोलीस ठाण्याचे कर्मचारी प्रभाकर डोईफोडे, विजय जाधव, ज्ञानेश्वर सुरुसे आणि प्रविण स्वार्डे यांनी केली आहे.
