‘एक पेड मा के नाम’ उपक्रमाने जळगाव सपकाळ शाळेत पर्यावरण आणि नारी-सन्मानाचा अनोखा संगम

‘एक पेड मा के नाम’ उपक्रमाने जळगाव सपकाळ शाळेत पर्यावरण आणि नारी-सन्मानाचा अनोखा संगम

जळगाव सपकाळ, दि. ०१: भोकरदन तालुक्यातील जिल्हा परिषद केंद्रीय प्राथमिक शाळा, जळगाव सपकाळ येथे ‘एक पेड मा के नाम’ हा राष्ट्रीय उपक्रम मोठ्या उत्साहात पार पडला. या उपक्रमाचा मुख्य उद्देश मुलींचा सन्मान, पर्यावरणाचे संवर्धन आणि आईच्या स्मृतींना आदराने उजाळा देणे हा होता.

या उपक्रमांतर्गत प्रत्येक मातेला आपल्या मुलीसोबत एक झाड लावण्याचं आवाहन करण्यात आलं. या भावपूर्ण संकल्पनेतून शाळेच्या प्रांगणात विविध फळझाडे, फुलझाडे आणि औषधी वनस्पती लावण्यात आल्या. विशेष म्हणजे, प्रत्येक रोपावर मुलीचं आणि तिच्या आईचं नाव लिहून एक भावनिक नातं तयार करण्यात आलं.

या कार्यक्रमात प्रमुख पाहुण्या म्हणून उपस्थित असलेल्या जिल्हा परिषद सदस्या सुनिता शिवाजी सपकाळ यांनी मातृत्वाचे महत्त्व आणि मुलींच्या सुरक्षिततेसाठी समाजाने एकत्र येण्याची गरज यावर भर दिला.

या प्रसंगी, शाळेने मुलींच्या सुरक्षिततेसाठी राबवलेल्या काही खास सुविधांची माहितीही पालकांसमोर सादर करण्यात आली. यामध्ये सीसीटीव्ही कॅमेरे, तक्रार पेटी, सॅनिटरी नॅपकिन वेंडिंग मशीन, आणि मुलींसाठी स्वतंत्र व स्वच्छ शौचालयांचा समावेश होता. या उपक्रमांवर शिक्षक, ग्रामस्थ आणि समितीच्या सदस्यांनी सकारात्मक प्रतिसाद दिला.

कार्यक्रमासाठी शाळा व्यवस्थापन समितीच्या अध्यक्षा वैशाली गोकुळ सपकाळ, सरपंच कु. विशाखा दिलीप साळवे, केंद्रप्रमुख भरत सपकाळ, मुख्याध्यापक नासिर शेख, ज्येष्ठ शिक्षक अशोक आराक यांच्यासह अनेक मान्यवर आणि पालक उपस्थित होते. मुख्याध्यापक नासिर शेख यांनी हा उपक्रम केवळ एक दिवसापुरता मर्यादित न ठेवता, तो नियमितपणे सुरू ठेवण्याचा संकल्प व्यक्त केला. शिक्षिका मनिषा भेंडाळे, सुरेखा मिसाळ, अनिता लोखंडे आणि अश्विनी वाघ यांनी या कार्यक्रमासाठी विशेष पुढाकार घेतला.

हा उपक्रम पर्यावरण प्रेम, नारी-सन्मान आणि सामाजिक जबाबदारी यांचा एक सुंदर संगम होता, ज्यातून शाळेने एक महत्त्वपूर्ण सामाजिक संदेश दिला आहे.