पुराचा फटका बसलेल्यांना मोठा दिलासा: ‘टंचाई’च्या सर्व सवलती लागू, बँकांनी वसुली थांबवावी – मुख्यमंत्री देवेंद्र फडणवीस यांची घोषणा

पुराचा फटका बसलेल्यांना मोठा दिलासा: ‘टंचाई’च्या सर्व सवलती लागू, बँकांनी वसुली थांबवावी – मुख्यमंत्री देवेंद्र फडणवीस यांची घोषणा

मुंबई, दि. ३०: पुरामुळे मोठे नुकसान झालेल्या शेतकरी आणि आपत्तीग्रस्त नागरिकांसाठी राज्य शासन खंबीरपणे उभे आहे. मंत्रिमंडळाच्या बैठकीनंतर बोलताना मुख्यमंत्री देवेंद्र फडणवीस यांनी महत्त्वपूर्ण घोषणा केली की, पूरग्रस्त भागातील नागरिकांना आता टंचाई निवारण काळात लागू असलेल्या सर्व सवलती आणि उपाययोजना मिळणार आहेत.

जीवनावश्यक वस्तू आणि वसुली थांबवण्याचे आदेश:

१) वसुली थांबवा: मुख्यमंत्री श्री. फडणवीस यांनी स्पष्ट निर्देश दिले की, अडचणीत असलेल्या शेतकऱ्यांकडील कर्जाची वसुली तातडीने थांबवावी. यासाठी बँकांना स्पष्ट आदेश देण्यात आले आहेत.

२) जीवनावश्यक वस्तूंचा पुरवठा: पूरग्रस्त कुटुंबांना गहू, तांदूळ, डाळी तसेच इतर आवश्यक वस्तूंचे किट तातडीने वितरित केले जात आहे.

 ३) स्वतंत्र राज्य मदत: विहीर खचणे किंवा शेतजमीन खरडून जाणे यांसारख्या केंद्र सरकारच्या निकषाबाहेरील नुकसानीसाठीही राज्य सरकार स्वतंत्रपणे मदत करणार आहे.

केंद्राच्या मदतीची वाट न पाहता निर्णय:

मुख्यमंत्री म्हणाले, नुकसानीचे पंचनामे लवकरच पूर्ण करून केंद्राला प्रस्ताव पाठवला जाईल. मात्र, केंद्राच्या मदतीची वाट न पाहता राज्य सरकारने स्वतःच्या निधीतून मदत सुरू केली आहे. केंद्राकडून नंतर ही रक्कम ‘रिइम्बर्समेंट’च्या (परताव्याच्या) स्वरूपात घेतली जाईल.

ओला दुष्काळ नाही, पण सवलती मिळणार:

‘ओला दुष्काळ’ (Wet Drought) जाहीर करण्याची मागणी होत असली तरी आपत्ती व्यवस्थापन नियमावलीत (मॅन्युअल) त्याची व्याख्या समाविष्ट नाही. तरीही, मंत्रिमंडळाने पूरग्रस्तांसाठी टंचाई निवारण काळातील सर्व निकषांनुसार सवलती लागू करण्याचा निर्णय घेतल्याचे मुख्यमंत्र्यांनी स्पष्ट केले.

राज्य शासनाच्या या निर्णयामुळे पूरग्रस्त शेतकरी आणि नागरिकांना मोठा आर्थिक दिलासा मिळाला आहे.