पारध येथील कीर्तन महोत्सवात ह.भ.प. ज्ञानेश्वर माऊली शेलुदकर यांचा तरुणांना व्यसनमुक्तीचा सल्ला

पारध येथील कीर्तन महोत्सवात ह.भ.प. ज्ञानेश्वर माऊली शेलुदकर यांचा तरुणांना व्यसनमुक्तीचा सल्ला

पारध, दि. ११: भोकरदन तालुक्यातील पारध बुद्रुक येथे सुरू असलेल्या अखंड हरिनाम सप्ताहाच्या निमित्ताने आयोजित कीर्तन महोत्सवामध्ये प्रसिद्ध समाजप्रबोधनकार ह.भ.प. ज्ञानेश्वर माऊली शेलुदकर यांनी तरुणांना व्यसनांपासून दूर राहून आनंदी जीवन जगण्याचा महत्त्वाचा सल्ला दिला.

व्यसनमुक्तीवर विशेष भर
या कीर्तन सोहळ्यात, तरुणांची लक्षणीय उपस्थिती पाहून माऊलींनी विशेषतः तरुण पिढीशी संवाद साधला. त्यांनी सध्याचा काळ अत्यंत खडतर असल्याचे सांगत प्रत्येकाला सावध राहण्याचा सल्ला दिला. तसेच, तरुणांनी व्यसनांच्या आहारी न जाता, परमेश्वराच्या मार्गावर चालल्यास जीवनात कधीही भरकटण्याची वेळ येणार नाही, असे मार्गदर्शन केले.

तरुणींसाठी खास संदेश
या वेळी त्यांनी तरुणींनाही मोलाचा संदेश दिला. आपल्या आई-वडिलांनी केलेल्या त्यागाची आठवण ठेवावी आणि समाजात त्यांची मान शरमेने झुकणार नाही, असे कोणतेही कृत्य करू नये, असे आवाहन त्यांनी केले.

या कीर्तनामध्ये व्यसनमुक्तीबरोबरच अनेक सामाजिक विषयांवर त्यांनी प्रकाश टाकला. या कार्यक्रमासाठी पारधसह आजूबाजूच्या अनेक गावांतून शेकडो भाविक उपस्थित होते. युवा कीर्तनकार ह.भ.प. अंबादास महाराज लोखंडे यांच्या नेतृत्वाखाली ३ ते १० ऑगस्ट दरम्यान हा अखंड हरिनाम सप्ताह सुरू होता.