२४ कोटींच्या अनुदान घोटाळा प्रकरणी फरार तलाठी छत्रपती संभाजीनगरमधून जेरबंद!

२४ कोटींच्या अनुदान घोटाळा प्रकरणी फरार तलाठी छत्रपती संभाजीनगरमधून जेरबंद!

जालना, दि. १७: जिल्ह्यातील बहुचर्चित नैसर्गिक आपत्ती अनुदान घोटाळा प्रकरणात आर्थिक गुन्हे शाखेच्या पोलिसांनी आणखी एका मुख्य आरोपीताला छत्रपती संभाजीनगर येथून शिताफीने अटक केली आहे. हा आरोपीत गेल्या दोन महिन्यांपासून अटकेपासून वाचण्यासाठी एका खोलीत लपून बसला होता.

या प्रकरणाची सुरुवात जालना जिल्हाधिकारी यांच्या आदेशानुसार गठीत करण्यात आलेल्या चौकशी समितीने केली होती. समितीच्या अहवालानुसार, यातील आरोपीतांनी स्वतःच्या ओळखीचे, नातेवाईक, मित्रपरिवार यांच्या नावाने बनावट, दुबार, किंवा क्षेत्रवाढ केलेले तसेच जिरायत जमीन बागायत दर्शवणारे आणि शासकीय जमीन (गायरान) नावावर दाखवणारे अर्ज तयार केले. या माध्यमातून शासनाचे तब्बल २४ कोटी ९० लाख ७७ हजार ८११ रुपयांचे अनुदान आपसात वाटून घेतल्याचे निष्पन्न झाले.

या घोटाळ्याप्रकरणी अंबड पोलीस ठाण्यात गुन्हा (क्र. ४५३/२०२५) दाखल असून, कलम ३१६, ३१८, ३२४, ३३६, ३३८, ३४०, ३३९, २३८, ३ (५) BNS सह आपत्ती व्यवस्थान कायदा २००५ नुसार कारवाई करण्यात येत आहे. सदर गुन्ह्यातील यापूर्वी अटक करण्यात आलेल्या चारही आरोपीतांना सध्या न्यायालयीन कोठडी सुनावण्यात आली असून, त्यांची जालना कारागृहात रवानगी करण्यात आली आहे.

फरार आरोपीतांचा शोध घेण्यासाठी पोलीस अधीक्षक अजयकुमार बंन्सल आणि अपर पोलीस अधीक्षक आयुष नोपाणी यांच्या मार्गदर्शनाखाली आर्थिक गुन्हे शाखेतील पथकाने गोपनीय माहिती व तांत्रिक विश्लेषण केले. या विश्लेषणातून, गुन्हातील फरार आरोपीत कल्याणसिंग अंबरसिंग बमनात (वय ३५, नोकरी: तलाठी, तहसील कार्यालय अंबड, रा. निहालसिंगवाडी) हा छत्रपती संभाजीनगर शहरात लपल्याची माहिती मिळाली.

आर्थिक गुन्हे शाखेच्या शोध पथकाने तत्काळ छत्रपती संभाजीनगर येथे धाव घेतली. पुष्पा नगर येथील एका खोलीत मागील दोन महिन्यांपासून मोबाईल किंवा इतर सोशल मीडियाचा वापर न करता स्वतःला कोंडून घेतलेल्या आरोपीत कल्याणसिंग बमनात याला पोलिसांनी अटक केली.

अटक केलेल्या आरोपीताकडे गुन्ह्याच्या अनुषंगाने सखोल तपास सुरू असून, या प्रकरणातील इतर फरार आरोपीतांचा कसून शोध घेतला जात आहे.

सदरची कामगीरी पोलीस उपअधीक्षक सिध्दार्थ माने (प्रभारी, आर्थिक गुन्हे शाखा जालना), स.पोलीस निरीक्षक मिथुन घुगे, आणि अंमलदार गोकुळसींग कायटे, समाधान तेलंग्रे, किरण चव्हाण, अंबादास साबळे, गजानन भोसले, सागर बावीस्कर, दत्ता वाघुंडे, विष्णु कोरडे, ज्ञानेश्वर खुने, रविंद्र गायकवाड, शुभम तळेकर, श्रेयस वाघमारे, चालक पाठक मेजर, महिला अंमलदार जयश्री निकम, निमा घनघाव, मंदा नाटकर यांनी यशस्वीरित्या पार पाडली.