पारध पोलिसांची कारवाई: कोरड्या दिवशीही दारू विकणाऱ्याला अटक, 71,480 रुपयांचा मुद्देमाल जप्त

पारध पोलिसांची कारवाई: कोरड्या दिवशीही दारू विकणाऱ्याला अटक, 71,480 रुपयांचा मुद्देमाल जप्त

पारध, दि. ०१ : जालना जिल्ह्यातील भोकरदन तालुक्यातील पारध पोलिसांनी एका कारवाईत दारूची अवैध विक्री करणाऱ्या एका आरोपीताला रंगेहाथ पकडले. ‘कोरड्या दिवसा’चे आदेश असतानाही दारूची विक्री केल्याप्रकरणी पोलिसांनी 71,480 रुपयांचा मुद्देमाल जप्त केला आहे.

दिनांक 1 ऑगस्ट 2025 रोजी रात्री 8:20 च्या सुमारास ही कारवाई करण्यात आली. मिळालेल्या माहितीनुसार, आन्वा ते जळगाव सपकाळ रोडवर असलेल्या आनंद बियरबारसमोर रमेश आनंदा काळे (वय 54, रा. आन्वा) हा आरोपीत बेकायदेशीरपणे दारूची विक्री करत होता.

जिल्हाधिकाऱ्यांनी ‘कोरड्या दिवसा’साठी दारू दुकाने बंद ठेवण्याचे आदेश दिलेले असतानाही आरोपीताने या आदेशाची पायमल्ली केली.

पोलिसांनी घटनास्थळी जाऊन आरोपिताला ताब्यात घेतले आणि त्याच्याकडून विदेशी दारूच्या 180 मिलीच्या एकूण 10 सीलबंद बाटल्या जप्त केल्या, ज्यांची किंमत 1,480 रुपये आहे. या दारूमध्ये ‘ग्रँड मास्टर वोडका’ आणि ‘गोवा जिन’ या ब्रँड्सचा समावेश होता. यासोबतच दारूच्या वाहतुकीसाठी वापरलेली 70,000 रुपये किमतीची हिरो एचएफ डिलक्स मोटरसायकल (क्रमांक एम.एच.20 ई.एच.1560) देखील पोलिसांनी जप्त केली.

याप्रकरणी पोलीस नाईक गणेश निकम यांनी दिलेल्या तक्रारीनुसार पारध पोलीस ठाण्यात आरोपीतांविरुद्ध गुन्हा दाखल करण्यात आला आहे. पुढील तपास पोलीस हवालदार एस.सी. खिल्लारे करत आहेत. ही कारवाई सहाय्यक पोलीस निरीक्षक संतोष माने यांच्या आदेशाने करण्यात आली.