उरी, पुलवामा अन् आता पहलगाम… प्रत्येक घावाचा वचपा! ‘ऑपरेशन सिंदूर’ने पाकिस्तानला दाखवली भारताची ताकद!

उरी, पुलवामा अन् आता पहलगाम… प्रत्येक घावाचा वचपा! ‘ऑपरेशन सिंदूर’ने पाकिस्तानला दाखवली भारताची ताकद!

भारताच्या इतिहासात असे अनेक क्षण आले आहेत, जेव्हा शत्रूंनी भ्याड हल्ले करून देशाच्या छातीत वार करण्याचा प्रयत्न केला. उरी असो, पुलवामा असो किंवा आता पहलगाम… प्रत्येक वेळी भारताने मोठी जखम सोसली, पण प्रत्येक वेळी त्या दुःखातून उसळी मारत शत्रूंना त्यांच्या कृत्यांची किंमत चुकती केली आहे.

22 एप्रिलचा दिवस भारतीयांसाठी वेदना घेऊन आला. पहलगाममध्ये निष्पाप पर्यटकांना दहशतवाद्यांनी केवळ त्यांचा धर्म विचारून गोळ्या घातल्या. या अमानुष कृत्याने प्रत्येक भारतीयाचा ऊर संतापाने भरून आला होता. पाकिस्तानला या कृत्याची जबर किंमत चुकवावी लागेल, अशी मागणी जोर धरू लागली होती. आणि अखेर, बुधवारी पहाटे भारतीय सैन्याने थेट पाकिस्तानमध्ये घुसून ‘ऑपरेशन सिंदूर’ (Operation Sindoor) च्या माध्यमातून दहशतवाद्यांच्या अड्ड्यांवर हवाई हल्ले चढवले आणि त्यांच्या योजनांची राखरांगोळी केली. पहलगामच्या जखमेवर फुंकर घालत भारताने हिशोब चुकता केला!

पाकिस्तान आणि त्यांच्या पाळलेल्या दहशतवाद्यांना कदाचित याची कल्पनाही नसेल की भारत अशा कठोर पद्धतीने प्रत्युत्तर देईल. हे ऑपरेशन केवळ एक हवाई हल्ला नव्हता, तर त्यात सर्जिकल स्ट्राईकचीही झलक होती. याच निमित्ताने, भूतकाळात भारताने दाखवलेल्या अशाच धाडसी कार्यांवर एक नजर टाकूया…

उरीचा बदला: सर्जिकल स्ट्राईकचा धाडसी निर्णय!
18 सप्टेंबर 2016 रोजी जम्मू-काश्मीरमधील उरी सेक्टरमध्ये भारतीय लष्कराच्या तळावर झालेल्या भीषण दहशतवादी हल्ल्यात 19 जवान शहीद झाले होते. या हल्ल्याने संपूर्ण देश हादरला होता आणि पाकिस्तानविरोधात कठोर कारवाईची मागणी जोर धरू लागली होती. भारताने संयम राखत, या हल्ल्याच्या केवळ 11 दिवसांनंतर, 29 सप्टेंबर रोजी पाकव्याप्त काश्मीरमध्ये (PoK) आपल्या पॅरा स्पेशल कमांडोंच्या मदतीने सात दहशतवादी अड्ड्यांवर सर्जिकल स्ट्राईक केला. रात्रीच्या अंधारात, शत्रू झोपेत असताना भारतीय जवानांनी ही मोहीम फत्ते केली आणि सुरक्षितपणे मायदेशी परतले. या कारवाईत अनेक दहशतवादी आणि त्यांचे प्रशिक्षक मारले गेले. सुरुवातीला पाकिस्तानने या हल्ल्याचा इन्कार केला, पण नंतर नुकसान झाले नसल्याचा दावा करत अप्रत्यक्षपणे कबुली दिली.
पुलवामाचा आक्रोश: एअर स्ट्राईकने दहशतवाद्यांना दाखवली जागा!

14 फेब्रुवारी 2019 रोजी पुलवामा येथे झालेल्या आत्मघाती हल्ल्याने देशाला आणखी एक मोठा धक्का बसला. या हल्ल्यात सीआरपीएफचे 40 जवान शहीद झाले. एका स्थानिक दहशतवाद्याने कारच्या मदतीने हा भ्याड हल्ला केला होता. या घटनेनंतर देशभरात संतापाची लाट उसळली. भारताने या हल्ल्याचा बदला घेण्यासाठी योजना आखली आणि 26 फेब्रुवारी रोजी, हल्ल्याच्या 12 दिवसांनंतर, भारतीय जवानांनी मिराज 200 फायटर जेटच्या सहाय्याने थेट पाकिस्तानात घुसून बालाकोटमधील जैश-ए-मोहम्मदच्या दहशतवादी प्रशिक्षण केंद्राला एअर स्ट्राईक करून उद्ध्वस्त केले. अनेक रिपोर्ट्सनुसार, या हल्ल्यात 10 बॉम्ब टाकण्यात आले होते आणि पाकिस्तानच्या खैबर पख्तुनख्वा प्रांतात झालेल्या या कारवाईत जवळपास 300 दहशतवादी मारले गेल्याचा अंदाज वर्तवण्यात आला होता. जरी भारत आणि पाकिस्तानने अधिकृत आकडा जाहीर केला नसला तरी, भारताने दहशतवाद्यांना त्यांच्या कृत्याची किंमत चुकवण्यास भाग पाडले होते. या कारवाईनंतर पाकिस्तानने प्रत्युत्तर देण्याचा प्रयत्न केला, ज्यात विंग कमांडर अभिनंदन यांचे विमान पाकिस्तानात कोसळले. मात्र, भारताने आपल्या मुत्सद्देगिरी आणि दबावामुळे त्यांना केवळ दोन दिवसांत सुखरूप मायदेशी आणले.

भारताचा स्पष्ट आणि कठोर संदेश!
भारताने या दोन्ही मोठ्या कारवायांची माहिती जगाला दिली आणि हे स्पष्ट केले की आमची कारवाई केवळ दहशतवाद्यांविरोधात आहे, पाकिस्तानची जनता किंवा सैन्याला लक्ष्य करणे आमचे उद्दिष्ट नाही. मात्र, जर पाकिस्तान दहशतवाद्यांना आश्रय देत राहिला, तर भारत घरात घुसून त्यांचा खात्मा करेल, असा स्पष्ट आणि कठोर संदेश भारताने जगाला आणि विशेषतः पाकिस्तानला दिला होता. दुर्दैवाने, यानंतरही पाकिस्तानच्या दहशतवादी कारवाया थांबल्या नाहीत.

पहलगामचा बदला: ‘ऑपरेशन सिंदूर’ – दहशतवाद्यांच्या पापाचा घडा भरला!
आता भारताने पहलगाम दहशतवादी हल्ल्यालाही तितकेच कठोर प्रत्युत्तर दिले आहे. बुधवारी रात्री 1.30 वाजता भारतीय सैन्याच्या तिन्ही दलांनी संयुक्तपणे (Joint Operation) पाकव्याप्त काश्मीर (PoK) आणि पाकिस्तानातील 9 दहशतवादी तळांना हवाई हल्ला करून उद्ध्वस्त केले. या ऑपरेशनला ‘सिंदूर’ (Sindoor) असे नाव देण्यात आले आहे. भारताच्या शूर जवानांनी पाकिस्तानातील 4 आणि पाकव्याप्त काश्मीरमधील 5 तळांना अचूक लक्ष्य केले आणि दहशतवाद्यांना त्यांच्या अमानुष कृत्याची शिक्षा दिली.

उरी, पुलवामा आणि आता पहलगाम… प्रत्येक वेळी भारताने आपल्या जवानांच्या बलिदानाचा आणि नागरिकांच्या दुःखाचा बदला घेतला आहे. ‘ऑपरेशन सिंदूर’ हे त्याचे ताजे उदाहरण आहे. या कारवाईने भारताने पुन्हा एकदा हे सिद्ध केले आहे की दहशतवाद्यांना आणि त्यांना आश्रय देणाऱ्यांना भारतीय भूमीवर कोणतीही किंमत चुकवावी लागेल!